Hiv aidsilu eqqartussallugit suli paqumigineqartarput
Ullumi ulloq tassaavoq Naalagaaffiit Peqatigiit Nunarsuarmi Aids-imut ullorititaat. Nunatsinni arlalinni ullumikkorpiaq pinngikkaluanik malunnartinniarneqassaaq.
Nunatsinni hiv-mik tunillatsissimasut 62-iusut nakorsaanerup Karin Ladefogedip Dronning Ingridip Napparsimmavissuanit nalunaarutigaa.
Taanna nakorsaq Millie Rydbacken peqatigalugu Nuummi Sisimiunilu hiv-mik aids-imillu nappaatillit inuunerannik ukiuni kingullerni marlunni misissuisimapput.
- Hiv-mik aids-imillu nappaatillit suli ilaqarput nappaatertik pillugu matoqqasunik, kanngusunneq imminullu pisuutinneq pissutigalugu. Ilaqarpulli nappaatiminnik akuerinnissimasunik. Ullumikkummi nakorsaatit ima pitsaatigaat, allaat hiv-mik aids-imillu tunillatsissimasut inuttulli allatut inuusinnaallutik. Allatulli utoqqalillutik, aids-imik pissuteqanngitsumik, toqusartunik. Karin Ladefoged nassuiaavoq.
Hiv-p uumasuaraa, aids-eqalissutaasinnaasoq nunatsinnut 1985-imi takkuteqqaarmalli maannamut inuit 150-it sinneqalaartut tunillanneqarsimapput, taakku ilaat 62-it maanna akornatsinniipput.
-Hiv-mik tunillatsittartut ikiliartorput, malunnarporlu hiv-qalersimasut sivisunerusumik inuusartut amerliartortut. HIV katsorsavinneqarsinnaanngikkaluarluni aids-innguunnissaanut pinaveersaataasumik nakorsaateqarpoq pitsassuarnik, Karen Ladefoged nassuiaavoq.
Nunatsinni hiv-mik nappaateqartut inuuniarnermikkut atugaat pillugit nakorsat misissuinerat naammassereerpoq, tamanulli nalunaarusiarinissaa aappaagu aatsaat pissaaq.