Paamiuni nakorsaqanngilaq
Nakorsaq paarlattaasoq arfinngormat aallarpoq, paarlattaasussaq alla pingasunngorpat tikissaaq taannalu decembarip ulluisa 28-ata tungaanut sulissaaq, Sermersuumi qitiusumik immikkoortortami nakorsat pisortaat Jesper Olesen oqarpoq.
Aamma atuaruk Nuummi nakorsiartarfik nakorsanik amigaateqarpoq
Kommuneqarfik Sermersuumi kommunalbestyrelsemut ilaasortaq Tim Serritzlev (S) tamatumunnga qisuariaateqarpoq:
- Nakorsaqannginnera pissutigalugu toqqissisimanngilanga, nallittorsuit nalliutilerput, juullikkuni pingaartumillu ukiutoqqami nakorsaqassanngippat, arlaatigullu ajutoortoqassagaluarpat, Paamiut peqqissaaviani passussisinnaasunik killeqartumik sulisinnaasunik sulisoqarami, annertuumillu ajoqusertoqarpat, ima isiallaannartumik nakorsamik tikinneqarsinnaanerput qularigakku, ukiuummat silarluttarlunilu, timmisartullu tikittarnissat nalorninarmat, tamanna toqqissisimanarinagu qisuariarpunga, Tim Serritzlev oqarpoq.
Qitiusumik immikkoortortami nakorsat pisortaat Jesper Olesen oqaluttuarpoq, Paamiuni peqqissaavimmi nakorsamik aalajangersimasunik upernaarli nakorsaqarsimanngitsoq.
- Nakorsanik sivisunerusumik Paamiuni sulisinnaasunik pissarsiniarneq piffissami sivitsortumi ajornartorsitigivarput, nakorsat paarlattaallutik upernaarli ulluni 14-nit sivisunerunngitsumik Paamiut Peqqissaaviani sulisarput, Jesper Olesen oqarpoq.
Nakorsat pisortaat Jesper Olesen Paamiuni innuttaasunut tuppallersaavoq:
- Nakorsaq paarlattaasussaq pingasunngorpat tikissaaq, taannalu ulluni 14-ini sulissaaq taannalu aallarpat nakorsaq alla aamma ulluni 14-ini suliartorluni tikissaaq, taassumalu kingorna nakorsat sapaatit-akunnerini sisamani Paamiut peqqissaaviani sulisartussat tikittassallutik, Jesper Olesen oqarpoq.
Paamiuni peqqissaavimmi sulisut nakorsaqannginnerup nalaani Nuummi nakorsiartarfimmi nakorsanit siunnersorneqarlutik ikiorneqartassapput.
Aamma atuaruk EU-mut ilaasortaannginnerput nakorsassaaleqitippaatigut
Paamiut peqqissaaviani peqqissaasut Nuummi nakorsiartarfimmi nakorsanut aalajangersimasunut attaveqarput, taakkua Paamiuni peqqissaavimmut nakorsiartoqaraangat siunnersorneqartarput nakorsiartoq qanoq passunneqartariaqarnersoq aamma qanoq iliortoqatariaqarnersoq. Aammalu suna ajoqutigineraa paasiniarlugu oqaloqatigineqartarlutik siunnersorneqartarlutillu, Jesper Olesen oqarpoq.