EU-mut ilaasortaannginnerput nakorsassaaleqitippaatigut

Nunatsinni nakorsassaaleqineq ajornartorsiutaasoq, arlaleriarluni eqqartorneqartarpoq. Nakorsallu pisariaqartinneqartut affaat sinnerlugit ullumi sulipput. Ajornartorsiulli taanna aaqqiiviginiarlugu, peqqissutsimut naalakkersuisoq Doris Jakobsen suliniuteqarpoq. 

-Nunatsinni naluneqanngitsutut nakorsassaaleqineq annertoorujussuuvoq. Ullumikkut nakorsat 100-rujuusussaagaluartut affai sinnerlugit amigaatigivagut, taamaammallu aamma vikarinik avataaninngaaniit tikisitsiortortariaqarluta, peqqissutsimut naalakkersuisoq Doris Jakobsen taama oqarpoq.

Nunatta EU-mut ilaasortaannginnera pissutaalluni, nakorsat nunanit allanit Nunatsinnut tikisinniartarnerat ajornartorsiutaavoq. 

Aamma atuaruk Doris: WHO-p TB-mut akiuinitsinnik ikiussavaatigut

Tamannali allanngortinniarlugu Doris Jakobsen Danskillu peqqissutsimut ministeriat Sophie Løhde aaqqiiniarlutik isumaqatigiiniarsimapput. 

- Nunarput EU-mut ilaasortaannginnera pissutigalugu ajornartorsiutigisorujussuuarput nakorsat taavalu aamma kigutilerisut nunatsinni sulitinniarnissaat ajornakusoortorujussuummat. Taamaammat saaffiginnissutigivara ajornartorsiutip taassuma ajornanngippat piaartumik aaqqiffiginiarneqarnissaa, Doris Jakobsen taama oqarpoq. 

Isumaqatigiinniarnermullu Danskit peqqissutsimut ministeriat Sophie Løhde soqutiginnippasimmat, Doris Jakobsen isumalluarpoq.

- Sundhedministeri ataatsimeeqatiginerani soqutiginnippoq iluarsiiniaqataanissamut ikiuutaarusulluni, peqqissutsimut naalakkersuisoq Doris Jakobsen taama oqarpoq.