Doris: WHO-p TB-mut akiuinitsinnik ikiussavaatigut
Nunatsinni TB-rtut 2014-imi 95-usut ukioq manna 44-ut tunillatsereersimapput. Tamannalu nunatsinni peqqinnissaqarfimmi sulisunit ernumanartutut isigineqarpoq.
Taamaattumik TB-mut akiuiniarnermut iliuusissatut pilersaarutip nalilersorneqarnissaanut, WHO-mit ikiorneqarnissaq siunertaralugu, peqqissutsimut naalakkersuisup danskit peqqissutsimut ministeriat saaffigaa.
- Ullumikkut tuberkulosertut nunatsinni annertummata immikkut iliuuseqarnissaq tassunga siunertaralugu, Doris Jakobsen oqarpoq.
Aamma atuaruk Tuberkulosimik nappaatillit amerlavallaarput
Doris Jakobsenillu tamanna pillugu danskit peqqissutsimut ministeriat iluatsittumik ullumikkut naapeqatigaa.
- Tassa saaffiginnissuterput ilassilluarpaa taavalu aamma akuersilluni, taamaammat WHO-mut saaffiginninnissaq isumaginiarlugu neriorsuutigivaa, peqqissutsimut naalakkersuisoq, Doris Jakobsen oqarpoq.
Nunarput Naalagaaffiit Peqatigiit peqqinnissamut suleqatigiiffiannut, WHO-mut, nammineerluni ilaasortanngilaq, nammineerlunilu saaffiginnissinnaanani. Taamaammat nunatta Danmark matumani aqqutigisariaqarpaa.
Naalagaaffiit Peqatigiit peqqinnissamut suleqatigiiffiata sakialluummut akiuiniarnermut nunarsuaq tamakkerlugu misilittagaqarluarmat nunatsinniit ikiortiserinissaanut tulluartippaa.
- Tuberkulosemut, tassunga sakkialluummut akiuiniarnermut periusissiap nalilersorneranut suleqataanissaa tassani siunertarivarput, peqqissutsimut naalakkersuisoq, Doris Jakobsen (S) taama oqarpoq.
