Nuummi nakorsiartarfik nakorsanik amigaateqarpoq
Nuummi nakorsiartarfimmi pisortap nakorsanullu qullersaasup Jesper Olesen-ip normoqarlutik nakorsiarniartut naammagittartariaqarnerat ilisimatitsissutigaa. Utaqqineq sivisoorsuusarmat nakorsiat nerisassaminnik taquaqarlutik nakorsiartarfimmut utaqqiartortarnissaat kaammattuutigaa.
-Nuummi nakorsiartarfimmi pissutsit taamaannerat nakorsiat kamaatigissappassuk paasisinnaavara, toqqissisimanngitsutullu misigisimappata tamanna ajuusaarutigaara, Jesper Olesen nassuiaanermini taama oqarpoq.
Nangillunilu erseqqisaatigaa nakorsiartarfimmi nakorsianut sapinngisannguartik tamaat kiffartuussiniarsaralutik, nakorsiallu peqqissaasunik ilinniarsimasunik saaffiginnissinnaanerat innersuussutigalugu.
Pissutsit taamaannerat piffissami sivitsortumi atuuppoq, nakorsallu pisariaqartinneqartut pissarsiarineqanngippata kiffartuussinerup pitsaanerulernissaa qanittukkut pinavianngitsoq Jesper Olesenip ilimasaarutigaa.
- Nakorsanik atorfinitsitsinissaq anguniarlugu iliuuseqartuaraluarpugut, Danmarkimeersunillu amerlanertigut pissarsiortarpugut, ilisimasariaqarparpulli Danmarkimi aamma nakorsat amigaatigineqarput, taamaammat pissutsit qanittukkut pitsaanerulernavianngillat, nakorsiallu utaqqingaatsiartarnissaminnut naammagittartariaqarput, Nuummi nakorsiartarfiup pisortaa Nuummilu nakorsanut qullersaasoq Jesper Olesen naggasiivoq.