Paamiuni katersugaasiviup pisortaa nammineq iluarsartuussisoq

Umiarsuit takornariartaassuit aqqaneq marluk Paamiunut aasap ingerlanerani aqqusaarnissaminnik nalunaarsimapput. Tamannalu Paamiuni katersugaasivimmi pisortamut, Peter Lorentzenimut aasaq  manna ulapaartitsissasoq, Kommuneqarfik Sermersooq allappoq.

Paamiulli Katersugaasivia illutoqqamiimmat takornarianut innuttaasunullu takujuminarsarnissaa unammillernartoqalaarpoq. Suliarineqaleruttortorli katersugaasiviup pisortaata oqaatigaa.

- Katersugaasiviup illutaa iluarsartuunneqartariaqalivissimavoq - silataani aamma iluani. Iluarsartuunneqarneralu maanna aallartereerpoq ukiullu sinnera tamatumunnga atorneqassalluni. Taamaakkaluartoq aasaq manna umiarsuit takornariartaassuit tikinnissaannut piareersimalluinnarpugut, Peter Lorentzen oqarpoq.

AAMMA ATUARUK Nuuk nutaamik katersugaasivittaalersoq

Katersugaasiviup pisortaata suliassat amerlanersaat nammineerluni suliarai illoqarfimmili ilinniartitsisut tallimanngornikkut sapaatikkulli ikiuuttarput. Aasaanerani allamik ikiortaasussamik atorfinitsitsinissaq aamma pilersaarutaavoq.

Iluarsartuussineruinnaanngilarlu, Peter Lorentzenimmi sannaviusimasoq katersugaasiviup sanianiittoq pilersaaruteqarfigaa.

- Katersugaasiviup eqqaaniippoq sannavik, taanna saqqummersitsivittut atorneqartaraluarpoq. Taama atortarunnaarnissaa eqqarsaatersuutigaara tassa meeraaqqeriviit, atuartut allallu sannavissaattut atorneqalernissaa eqqarsaatersuutigigakku. Tassani assassornermik ilinniartitsineq ingerlanneqarsinnaalluni, Peter Lorentzen oqarpoq.

Peter Lorentzen februaarip aallaqqaataani katersugaasivimmi pisortanngorpoq, siusinnerusukkulli 1994-imit 2012-imut tassani aamma atorfeqareersimalluni.

AAMMA ATUARUK Dinosarit pillugit Nunatsinni katersugaasiveqartariaqaraluartoq