Borgmesteritut tullersorti kommunalbestyrelsimi attaviitsunngortoq
Naqqiissut: Ilanngutassiami siusinnerusukkut Gideon Lyberth kommunalbestyrelsimit tunuartoq allassimagaluarpoq. Tamanna eqqortuunngilaq. Taanna attaviitsunngorniarluni aalajangerpoq.
‘Sivisuumik eqqarsaatigereerlugu kommunalbestyrelsemi attaviitsunngorlunga illuatungiliuttunik suleqatigiissummik atsiugaqarlunga isumaqatigiissuteqarpunga’.
Gideon Lyberthip Facebookimi allaaserisani taama aallarnerpaa.
Gideon Lyberthip allaaserisaa naapertorlugu, taanna Qeqqata Kommuniani kommunalbestyrelsep Sisimiut kommunimi illoqarfik annertut siunissami ineriartortinneqarnissaa aallunniarmassuk, attaviitsunngussalluni aalajangerpoq.
- Amerlanerussuteqartut Siumup IA-llu inuttut politikkeritullu pingaartitakka qaangerujussuarpaat, annerusumik Sisimiut kisiat ineriartortissallugu aalajangiinermikkut, politikeri allappoq.
- Uanga qinikkatut pingaartilluinnartuuara sumiiffiit tamarmik illoqarfiuppata nunaqarfiuppataluunniit assigiimmik ineriartortinneqarnissaat, taannalu aatsaat pisinnaavoq illuatungiliuttunik suleqateqarnikkut.
Kangerlussuup eqqaanut pilersaarusiortoqangaatsiartoq
Gideon Lyberthip oqarnera naapertorlugu Namminersorlutik Oqartussat Kangerlussuup eqqaani pilersaaruteqangaatsiarput, kommunili pilersaarutinut ilaatinneqanngitsoq, politikeri allappoq.
Taamaammat Qeqqata Kommuniani inuussutissarsiornermik ineriartortitsinermut iluaqutaasussamik inuussutissanut aatsitassanullu ataatsimiititaliamik nutaamik pilersitsisoqarpoq.
Gideon Lyberthip Siumumit tunuarnermi kingorna attaviitsutut ingerlaqqinniarnerarluni allappoq. Partiimut allamut ilanngunniarluni saqqummersitaani allassimanngilaq.
KNR-ip Gideon Lyberth attaveqarfigaa borgmesteri, Malik Berthelsenilu oqaaseqartinniarsaralugu.
Siumumit tunuartoq
- Kommunimi partiip gruppianit tunuarniarpunga, Siumumiiginnarusuppunga kisianni taamaaliorsinnaanngilanga, Gideon Lyberth KNR-imut ualimut oqarpoq.
Gideon Lyberth borgmesterimut tullersortaaginnassaaq, tamanna taassuma borgmesterillu Malik Berthelsenip oqaatigaat.
- Aalajangernera uggoraara, kisianni suleqatigiilluarnerput ingerlatiinnarsinnaassagipput naatsorsuutigaara, Malik Berthelsen oqarpoq.
- Illuatungiliuttunik suleqateqarnermut tunngavilersuutaa paasisinnaanngilara, partiimmi taakku isumaqatigiissut taassuma kommunimi siumut gruppianit tunuarneranut pissutaasoq aamma akuerinikuuaat, borgmesteri oqarpoq.
