Pissartanngornermiit ingerlaannaq nunanut allanut unammiartortut
Kalaallit arnat assammik arsarnermi nunanut allanut unammisartut unamminermi EVO Womens Challengemi ullumimiit peqataassapput.
Taamaasillutik arsartut arlallit qasuersaarnissamut piffissakipput Nunatsinni pissartanngorniunneq Sisimiuni inissinniuttoqarneratigut sapaatiummat naammassisoq peqataaffigigamikku.
Ukiut 16-it tulleriissillugit GSS Nuummeersoq arnani angutinilu pissartanngorpoq. Arnani SAK akiuulluarpoq finalemi 26-22-mik ajorsarlutik muminnermi 11-10-mik kinguaqqareerlutik.
SAK-meersut sisamat ukiup iligiivinut ilanngupput. Taakku tassaapput isertitsinerpaaq Tanja Kristiansen, måliniittoq Maja Motzfeldt-Skovgaard, Hanna Nielsen Kleist titarnerullu killinganiittoq Niviaq Fleischer. Isertitseriallaqqissoq inuusulluinnartoq Ajla Biibi Knudsen ukiup iligiiviniippoq isuani arsallaqqissut Andrea Heilmann GSS-imiit aamma Nuunu Maria Lukassen NÛK-miit aamma ukiup iligiiviniittut.
Inuusuttut malunnaatillit
Angutini ukiup iligiivini malunniutillit peqatigiiffinniit assigiinngitsuneersut toqqagaapput. Isak Olsen angutini måliniittartuni qularutissaanngitsumik kakkannersaavoq inissanilu allaniittut takutippaat inuusuttut siumukarluartut.
16-iinnarnik ukiulik Noah Rosbach Duus Nagdlúnguami arsaqataasoq isaatitsinersaasoq ukiup iligiiviniippoq. Sebastian Jensen NÛK-meersoq inuusulluinnartoq piukkunnaatilik isuani talerperlermiittutut toqqagaavoq isuani saamerlermi isuaniittutut misilittagartooq Aqqalu Sandgreen Norsaq HC-meersoq ukiup iligiiviniittunut ilaasoq.
SAK-mi malunniutilik inuusoqisoq Archibald Lennert tunuani talerperlermiittutut ukiup iligiivini toqqagaavoq titarnerullu sinaani tamaviaartuartoq Milan Olsen Nagdlúnguameersoq toqqagaalluni.
Eqqaaneqareersutut arnat arsarluartut arlallit ulluni arfinilinni sakkortuumik unammereerlutik sivikitsuinnarmik qasuersaareerlutik maanna Parisimiipput. Unammineq kalaallit peqataaffigisaat tassaavoq EVO Womens Challenge tassanilu peqataapput Canada, Congo, Kalaallit Nunaat peqatigiiffiilu marluk Parisimeersut.
Unamminerit KNR-TV-imi aallakaatinneqassapput siulleq aallartissaaq sisamanngornermi nalunaaqutaq 17.40.
