Oqartussat Boeingip timmisartuani assortuussutaasumi ajoqutaasinnaasumik allamik paasisaqartut
Timmisartup misilerarneqarnerani ajoqutaa sapaatip akunnerata siuliani paasineqartoq,
tusarfiit suliamut ilisimannittut taama paasissutissiisut, Reuters allaaserisaqarpoq.
Timmisartut Boeingit angallassisinnaanngoqqissappata ajoqutit aaqqinneqaqqarnissaat FAA-mit piumasarineqarpoq.
Timmisartut 737 Max-it juunip naanerani angallasseqqissinnaalernissaat qaammat kingulleq nalilerneqaraluarpoq.
Paasissutissalli nutaat kinguneranik Boingit misiliummik timminissaa siusinnerpaamik juulip 8-anni naatsorsuutigineqarpoq.
AAMMA ATUARUK Boeingimi nakkartumi timmisartortartut malittarisassat tamaasa malippaat
Timmisartut taakku nunarsuarmi tamarmi marsip qaammataanili timmisartuusseqqusaajunnaarput. Indonisiami Etiopiamilu timmisartut marluk nakkarnerani inuit katillugit 346-t toqunerannik aallaaveqartumik.
- FAA-p suliassaraa timmisartuni akornutaasinnaasut paasiniarneqarnissaat erseqqissaatigissallugit. FAA-llu aarlerinartutut paaseqqammigaa Boeingip aaqqiissuteqarfiginiassagaa, FAA Reutersimut allappoq.
Taama nalunaaruteqarnera pissutigalugu timmisartuutileqatigiiffiup United Airlinesip timmisartut 737 Maxit tamarmik septembarip pingajuata tungaanut nunamiitsiinnarniarlugit aalajangerpaa.
Tamatumalu nassartarisaanik timmisartuussinissat 1900-t missaanniittut aggustimiinnaq taamaatiinnarneqassapput.
AAMMA ATUARUK Timmisartoq Boeing ajornartorsiorluni nunnittariaqartoq