Nalunaarusiaagallartoq: Boeingimi nakkartumi timmisartortartut malittarisassat tamaasa malippaat

Reuters naapertorlugu ajunaarnermik misissuinermik nalunaarusiaagallartumi taama allassimasoqarpoq.

- Timmisartumi sulisut sulinermi malittarisassat tamaasa arlaleriarlutik malittaraluarpaat, timmisartorli aqussinnaajunnaarsimallugu, Etiopiap angallassinermut ministeria oqarpoq.

Taamaattumik timmisartuliorfiup Boeing-ip timmisartuliaani nutaami 737 Max 8-mik taaguuteqartumi nakkutiginninnermut atortorissaarutai misissorneqartariaqartut innersuussutigineqarpoq.

Ajunaarnermik misissuinermi inaarutaasumik nalunaarusiaq ukiup ataatsip ingerlanerani piariissangatinneqarpoq, Reuters naapertorlugu angallassinermut naalakkersuisoq oqarpoq.

AAMMA ATUARUK Timmisartoq Boeing ajornartorsiorluni nunnittariaqartoq

Timmisartoq Addis Ababamit qangattarnermi kinguninnguatigut nakkarpoq, inuillu 157-t ajunaarput.

Etiopiami nakkarnermi pisut Indonesiamilu siorna oktobarimi nakkarnermi pisut arlalitsigut assigiissuteqartut timmisartup boksiata qernertup takutippaa.

Indonesiami timmisartup nakkarneqarata kingorna Boeingip timmisartuliaata Max-ip qarasaasiaata programmii najoqqutaalu immikkut eqqumaffigineqalerput, tassami ajunaarnermut peqqutaaqataasuunissat pasineqarmat.   

Nunat arlallit ajunaarnerup kingornatigut timmisartumik taassuminngarpiaq Boeing-imeersumik timmisartornissaq unitsippaat.

Reuters naapertorlugu timmisartut 737-t qarasaasiaasa programmii najoqqutaallu nutaat ineriartortillugit Boeing aallartereerpoq.

AAMMA ATUARUK Timmisartut Boeingit ajoquteqartut siornali nalunaaruteqartarsimasut

AAMMA ATUARUK Boeing 737 Max 8-mik timmisartuussisarnerit Europa tamakkerlugu unitsinneqarallartut