Oqaatsivut tapersersorneqartut

Nunat Avannarliit Siunnersuisoqatigiivisa ippassaq ataatsimiinneranni, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Doris Jakobsen, siullermeerluni oqalugiarpoq.

Nunani avannarlerni oqaatsit pillugit politikkip oqaluuserineqarnerani nutaamik nalunaarusiornissaq Kalaallit Nunaannit tapersersorneqartoq oqariartuutigaa.

- Oqaatsit pillugit nalunaarummi nunani avannarlerni oqaatsit naligiittut isigineqarnerat, nunanilu avannarlerni oqaatsit nukittuujunerat uummaarissuunerallu nuannaarutigaarput. Pissutsit taamaaginnartinnissaat tamattaalluta pisussaaffigaarput, Doris Jakobsen oqarpoq.

- Aamma maluginiarparput kalaallisut oqaatsitta nunatsinni pingaarnertut inissisimanerat pissutaalluni immikkut inissisimasutut oqaatigineqartut tapersersorneqartariaqartullu inuiaqatigiinni pingaarnertut oqaaserineqarnerisa attatiinnarnissaat eqqarsaatigalugu, Doris Jokobsen oqarpoq.

Doris Jakobsenip aamma neriuutiginerarpaa, kalaallisut oqaatsivut ilinniartitaanermi, innuttaasunik sullissinermi, inatsisiliornermi assigisaannilu tamakkiisumik atorneqaleriartorumaartut.