Ocean Explorer nusullugu kaanngartinneqarpoq

Umiarsuaq takornariartaat Tunup avannaani ataasinngormat ualikkulli ikkarleqqasimasoq sisamanngornermi qulingiluat qaangilaaraa nusullugu kaanngartinneqarsimasoq Issittumi Sakkutooqarfik KNR-imut ilisimatitsivoq. 

Pinngortitaleriffiup aalisakkanik ilisimatusarnermut umiarsuaa Tarajoq misileeqqissimavoq iluatsittumik. Taama Issittumi Sakkutooqarfimmi kommandørkaptajn aamma operationsafdelingimi pisortaq oqarpoq.

- Sumiiffimmi iluatsittumik Tarajup Ocean Explorerillu akornanni nutaamik pilersaarusiorsinnaasimanerat nuannaarutigaara.

- Imaaliorsimapput, Tarajumi umiarsuup naalagaa Ocean Explorerimut ikisimavoq, tassanilu pilersaarusiorlutik, Brian Jensen oqarpoq.

Isumaqatigiissutilli qanoq isikkoqarsimanera imaluunniit qanoq ililluni umiarsuup nusullugu kaanngartinneqarsimanera pillugu itinerusumik oqaaseqarsinnaanngilaq nammineq najuussimannginnami.

Umiarsuaq maanna umiarsualivimmut qaninnerpaamut ingerlanneqassaaq, tassani ilaasut mittarfimmut angerlamut timmisartuunneqarfissaannut assartorneqassallutik.

Islandiliassaaq

Ocean Explorer imarsiornermut aqutsisoqarfimmit umiarsualivimmut ingerlaaqquneqarsimavoq naqqa aqqartartunit misissorneqarniassammat. Issittumi Sakkutooqarfik KNR-imut taama ilisimatitsivoq. 

- Uuliakoortoqarneranik imaluunniit umiarsuup kivilerneranik qujanartumik nalunaarfigineqanngilagut. Umiarsuaq nusullugu kaanngartinneqaraangat tamanna ajornerpaamik pisinnaasuuvoq, Brian Jensen oqarpoq, nangillunilu:

- Umiarsuup qanoq innera paasissallugu maanna pissanganarpoq. Tamanna maanna pileruttorpoq. Umiarsuup ajoqusersimannginnissaa imaaniiginnarsinnaaneralu taamalu ingerlaaqqilersinnaanissaa misissorneqaleruttorpoq.

Brian Jensen oqarpoq, umiarsuaq takornariartaat Islandimi umiarsualivimmut ingerlaassajunnarsisoq, umiarsualiviit angisuut akornanni qaninnerpaammat. 

Issittumi sakkutooqarfiup nakkutilliissutaa umiarsuaq Knuds Rasmussen Alpefjordenimut suli ingerlaarpoq.

Knud Rasmussenip umiarsuaq, avatangiisit inuillu umiarsuarmiittut nakkutigissavai. Umiarsuaq nakkutilliilluni sumiiffimmiiginnarnissaa ilimanarpoq.

Ikiuuttunut qujavoq

Umiarsuaq takornariartaat Ocean Explorer 206-inik ilaasoqarluni Tunup avannaani ataasinngormat ualikkut ikkarippoq.

Umiarsuaq nammineerluni ikkarlummit kaanngarniarsimagaluarpoq, kisianni nationalparkimi Alpefjordenip eqqaani ullut unnuallu pingasungajaat ikkarleqqalluni. 

Pinngortitaleriffiup umiarsuaata Tarajup umiarsuaq takornariartaat pingasunngormat nusullugu kaanngarteriaraluarpaa iluatsinngitsumik.

Carsten Lundip umiarsuarmik takornariartaammik piginnittumik umiarsuaatileqatigiiffimmi Sunstonemi aningaasarsiornermut pisortap uppernarsarpaa Ocean Explorer nusullugu kaanngartinneqarsimasoq. 

Oqaaseqarnerusinnaanngilarli umiarsuaq Australiami takornariartitsinermik ingerlatseqatigiiffimmit Aurora Expeditionimit attartorneqarsimammat. 

Takornariartitsinermik ingerlatseqatigiiffik KNR-ip saaffiginnissutaanut suli akissuteqarsimanngilaq.

Sun Stone qujamasuppoq umiarsuarmit Tarajumit ikiorneqarsimagami. Arlaannaalluunniit umiarsuarmittoq ajoqusinnginnissaannut iliuuseqarsimasunut imaluunniit umiarsuarmut ikkarleqqasumut ikiuerusussimasunut tamanut qujassuteqartoq, umiarsuaatileqatigiit tusagassiorfinnut nalunaarummi allapput.