Isumaqatigiissummut kalaallit ilanngunneqanngitsut
Tamanna Aarhusimi Kalaallit Illuutaanni pisortap Jørn Holbechip ugguaraa.
- Suliniuteqartoqarpoq ingerlaannartariaqartunik. Taamaattumik isumaqatigiissummut ilanngunneqarsimannginneri Jørn Holbechip ajuusaarutigai.
Danmarkimi inuiaat allat ikinnerussuteqartut aamma isumaqatigiissummi eqqaaneqarsimanngillat.
AAMMA ATUARUK Danmarkimi inuusuttut ikiorniarneqalersut
Taamaakkaluartoq inuiaqatigiinni suliniuteqartariaqarmat kalaallit ajornartorsiortut immikkut ukkatarineqartariaqaraluartut, Jørn Holbech isumaqarpoq.
- Allat kingulliuttariaqarnerannik isumaqanngikkaluarpunga. Sorsuutigigigaana danskisut innuttaassusillit, aamma kalaallit assigiimmik periarfissinneqartariaqarnerat. Assigiimmik pineqarnermi isumaqanngilaq immikkut suliniuteqartoqarsinnaanngitsoq.
Isumaqatigiissut tamanut saqqummiunneqartinnagu ullut marluk sioqqullugu Aaja Chemnitz Larsenip Inuit Ataqatigiinneersup aningaasaqarnermut ministeri Kristian Jensen ataatsimeeqatigaa; kaallaallit inuuniarnikkut ajornartorsiortut Kommuunit Kattuffiannut KL-imut isumaqatigiissummi ilannguteqqullugit.
KL-ili KNR-imut nalunaarpoq naalakkersuisut isumaqatiginiarnerini kalaallit inuuniarnikkut ajornartorsiortut ilanngunneqarsimanngitsut.
Aaja Chemnitz Larsenili naapertorlugu anguniagaq ungasinnerusoq isigalugu anguniagaavoq.
- Unami aamma aningaasaqarnermut ministerip qanittukkut ataatsimeeqatiginerani Inuit Ataqatigiit aatsaat saqqummiuppaat. Politikkikkut ingerlariaaseq nalunnginnakku ilisimavara aappaagumut ilanngunneqarnissaa piviusorsiunngitsoq. Taamaattuminguna oqartugut siunissaq ungasinnerusoq eqqarsaatigalugu una anguniagaasoq.
Aalajangiusimavaali kalaallit Danmarkimut tikikkaangasa kommunit akisussaaffimmik annerusumik tigusillutik suliffittaajaarnissaannik ikiortariaqarmatigit.
- Tamannami tamatta soqutigisariaqarparput. Kommunit, naalakkersuisut aammalu Kalaallit Nunaata isumannaartariaqarpaat kalaallit ingerlalluartut amerliartornissaat, Aaja Chemnitz Larsen oqarpoq.
Folketingimi amerlanerussuteqartut siorna 36,4 millioner koruunit pilersaarutinut suliniutinullu assigiinngitsunut 2020-p tungaanut kalaallinut Danmarkimi ajornartorsiortunut aningaasaliissutigaat, taakkulu saniatigut 10 millioner koruunit Namminersorlutik Oqartussat meeqqanut inuusuttunullu suliniutinut atugassat.