Nuutsitsiniarneq toqqissisimanngitsitsisoq

Naalakkersuisut Saviminilerinermik Ilinniarfik Sisimiunut nuussasoq nalunaarutigeqqammerpaat. Taamaaliorniarnerlu sulisunut toqqissisimajunnaarsitsivoq. Sisimiunummi nooqataarusunngikkunik allamut suliffissarsiortariaqassapput.

Qaquguli tamanna pissanersoq suli nalunarmat nalorninartorsiortitsisoq Saviminilerinermik Ilinniarfimmi ilinniartitsisut sinniisaat oqarpoq.

- Suna tamarmi aallaqqaataaneertussaagami aamma nalunngilara faglærerit ilaqutareeqarpoq. Nuummut nooreernikuupput, illutaareernikuupput sorpassuit aaqqereernikuuaat soorlu meeqqeriviit assigisaallu, Ilinniartitsisut sinniisaat Erik Reimer oqarpoq.

AAMMA ATUARUK Ilinniarfiit nuunneqarnissaanik pilersaarutit nuannaarutigai

Naalakkersuisut nalunaarusiaat naapertorlugu sulisut sisamaappata pingasut Sisimiunut nooqataarusunngillat. Taamaattoqarneratalu Teknikkimik Ilinniarfimmi forstanderip suliffiit inuttassarsiornissaat ulapputigisussanngorpaa. Forstanderillu tamanna ernummatiginngilaa.

- Pilersaarutit piviusunngussappata soorunami sulisut ilaat nuukkusunnginnissaat. Taava nutaanik sulisussarsiortariaqassaagut taannalu sulisussarsiorneq sungiusimavarput, Jokum Møller oqarpoq.

Saviminilermik Ilinniarfimmi sulisut Sisimiunut nooqataarusunngitsut qanoq iliornissartik eqqarsaatigilertariaqarpaat. Atuarfiullu qaqugu nuunneqarnissaa suli ullulerneqanngimmat sulisunut nalorninartorsiortitsivoq.

- Eqqarsaatingilereertariaqarpara allamik suliffissarsiornissara, naluarali qaqungu. Suliffissarsiorniarutta piffissaatillugu ujarlertarpugut inissarsiortarlutalu- Sorpassuit paasiniartarpagut, Erik Reimer oqarpoq.

AAMMA ATUARUK Kimik forstår ikke udflytning af kunstskole til Aasiaat

Sisimiunullu nooqataassallutik akuersisimasut ulluinnaat sungiusimasatik qimattussaassavaat illoqarfigisarlu nutaaq sungiunniartussaassallugu. Nuuffissaasalu tamanna piareersimaffiginiarlugu pilersaarusiussallutik oqarpoq.

- Ukiuni tulliuttuni soorunami taanna eqqumaffiginiartussaassavarput pilersaarusiorlugulu qanoq annikinnerpaamik sunniuteqarnissaa eqqarsaatigalugu pilersaarusiortariaqassaagut ilinniartitsisut ilinniartitsisussallu eqqarsaatigalugit, Jokum Møller oqarpoq.

AAMMA ATUARUK Nuussuinissamik pilersaarut Naalakkersuisuni paatsiveerusimaarutigeqigaat