Kimik Eqqumiitsuliornermik Ilinniarfiup nuunneqarnissaa paasisinnaanngilarput
Tamannalu eqqumiitsuliortut peqatigiiffiannit Kimimmit kingumut isornartorsiorneqarpoq, peqatigiiffiummi Eqqumiitsuliornermik Ilinniarfiup Aasiannut nuunneqartussanngornera akerlerilluinnarpaa. Peqatigiiffiup siulittaasua, Lisbeth Karline Poulsen oqarpoq.
Aasiannut nuunneqassappat uggornartupilussuussaaq, Lisbeth Karline Poulsen KNR-imut taama oqarpoq nangillunilu:
- Ilinniarfimmi ilinnialertussat Aasianni periarfissaasa killeqarnissaat uggoraara.
Aasianni eqqumiitsuliornermik ilinniarfeqalernissaa Kimiup ajoriffissaqartinngikkaa
erseqqissaatigaa, Nunatsinnili eqqumiitsuliornermik ilinniarfik ataasiinnaatillugu ilinniartut eqqarsaatigalugit Nuummiittariaqarsoraa.
- Saqqummersitsinernut alakkarterisinnaassammata, katersugaasivik atuagaateqarfillu isumassarsiorfigalugit isiginnaartitsinernullu isiginnaariarlutik, siulittaasoq oqarpoq.
Nukinnik periarfissanillu iluaquteqarnissaq
Ilinniarfiit nuunneqarnissaannut siunertaavoq nukinnik aamma periarfissanik nunatsinni sumiiffinni assigiinngitsuniittunik iluaquteqarnissaq, peqatigisaanillu ineriartortitsinermik suliffissanillu pilersitsisarnissaq, Naalakkersuisut tusagassiorfinnut ippassaq ataasinngornermi nalunaaruteqarlutik taama allapput.
Lisbeth Karline Poulsenip Aasianni eqqumiitsuliornermik ilinniarfimmi ilinniartut saqqummersitsinerisa saniatigut saqqummersitsinerit allat qanoq amerlatigissanersut takujuminaatsippaa.
- Ineriartortitsinissamut periarfissat suussanersut takusinnaanngilakka. Isumaqarpunga ineriartortitsinissamik periarfissat tunngavigalugit nuussinissamik taaneqarnera uppernarpallaanngitsoq, siulittaasoq oqarpoq.
Naalakkersuisunit tusaaneqannginneq
Eqqumiitsuliornermik Ilinniarfimmi ilinniartut titartaanermik , akryli atorlugu qalipaanermik, assiliartalersuinermik teknikkikkullu naqiterinermik, mixed mediamik ilusilersuinermillu pikkorissartinneqartarput. Ilinniagarlu ukiumik ataatsimik sivisussuseqartoq atorlugu eqqumiitsuliortutut aallartittoqarsinnaavoq, imaluunniit pikkorissarneq atorlugu Danmarkimi nunanilu allani eqqumiitsuliornermik ilinniarfinnut allanut ingerlaqqittoqarsinnaalluni.
Kimiup siulittaasua Naalakkersuisunit tusaaniarneqanngitsutut misigisimavoq:
- Siorna tusagassiorfinnut nalunaaruteqarnitsinnut tunngatillugu immaqa tusaaniarneqarpallaarsimannginnerput aalajangiinermilu taama pingaaruteqartigisumi aperineqarsimannginnerput uggornartippara, Lisbeth Karline Poulsen oqarpoq.