Malik Berthelsen: Ilinniarfiit nuunneqarnissaanik pilersaarutit nuannaarutigai
Taassuma tusagassiuutitigut nalunaarummi Naalakkersuisut eqqortumik aalajangiisimanerarpai Sisimiuni nutaamik saviminilerinermik ilinniarfiliornissamut pilersaarusiorniarnerat.
- Teknikkikkut ilinniakkat tamarmik Sisimiuniilerpata suleqatigiinnermik pitsaasumik kinguneqarsinnaasoq, borgmesteri isumaqarpoq.
Sisimiuniittumut Tech College Greenlandimut Saviminilerinermik Ilinniarfik ilanngukkaanni sulisartutut ilinniartut atukkamikkut ilinniartitsisutigullu periarfissaqarluarnerulissapput, Aatsitassanut ilinniarfik DTU-ullu iluani issittumi ingeniørinngorniarfik aamma eqqarsaatigalugit.
Sisimiuni teknikkikkut nutaamik pilersitsisoqarsinnaasoq taanna isumaqarpoq, tamannalu Saviminilerinermik Ilinniarfimmi ilinniartitsisunut iluaqusiijumaartoq.
Taamaattumik Malik Berthelsen neriuppoq Saviminilerinermik Ilinniarfimmi ilinniartitsisut sapinngisamik amerlasuut Sisimiunut nuukkumassasut.
Qeqqata Kommuniata maanna Ilinniartitaanermut naalakkersuisoqarfik suleqatigalugu ilinniartitsisut ilinniartullu Sisimiuni pitsaasunik inissaqartinneqarnissaat qulakkeerniarsarinialerpai.
/erna lynge