Nuup sarfaaruttoornera: Unnuaq ajornartorsiuterpassuaqarfiusoq
Erngup nukinganik Utoqqarmiut Kangerluarsunnguanni nukissiorfimmit Nuummut kabelimi novembarip ulluisa 24-anni kittorartoqarpoq. Illoqarfiit pingaarnersaat nalunaaqutaq 9.13 sarfaaruppoq, nalunaaqutarli 13.05 sarfaqaqqilerluni.
Sulili sivisunerujussuarmik ajornartorsiorfiunerujussuarmillu sarfaaruttoortoqartussaavoq. Taamaattoqarnerani ajornartorsiutit arlallit Nukissiorfiit aatsaat nalaappaat.
Kabelimi kittorartoqarnera novembarip ulluisa 29-anni sarfaarutitseqqippoq. Tassanilu sivisunerpaamik sarfaqanngitsut akunnerni 18-ini sarfaaruteqqassapput. Nukissiorfimmiittullu akunnerni taakkunani ulapittorujussuusimasut, nassuiaataanni atuarneqarsinnaavoq.
Ajornartoornermi sarfaliuutip sarfaliuutit sinnerinik pingasunik aallartitsisussap nalunaaqutaq 22.53 aallartinngitsoornera sarfaaruttoornerup aallaqqaataaniilli ilungersortitsivoq. Sooq aallartinngitsoornersoq paassiaannginnamikku allanik aaqqiissutissarsiupallattariaqalerput.
AAMMA ATUARUK Nukissiorfiit Nuuk pillugu: Illoqarfiup ineriartornera nukissiuutinik pilersuinermut artukkiisoq
Sarfaliuutillu minnerujussuup atorneqarneratigut aaqqiissutissarsisoqarpoq.
- Innaallagissiorfimmi aqqutinut 10 kV-inut sarfaliilluni generatorip taassuma atornera iluatsitsiviuvoq, tamannalu generatorit anginerusut attavilersinnaaniarlugit pisariaqarpoq, nassuiaammi allassimavoq.
Aatsaat arlaleriarlugu misilittareerlugu iluatsippoq, aatsaavissuarlu taama aaqqiisoqarluni.
Unnuarli aatsaat aallartippoq.
Illuni nillertissimasuni kiassaatit sarfaliuutinik qamittoortitsisut
Ajornartoornermi sarfaliuutit tulliani attavilerneqassapput. Tamannalu nalunaaqutaq 00.56 aallartippoq.
Ajornartoornermili sarfaliuutit pisinnaasaat erngup nukinganik nukissiorfimmiit minnerujussuupput, sukkavallaartumillu attaviliisoqaraangat, sarfaliuutit motoorii qamittuussallutik. Taamaammat arriitsumik attavilersuiartuaarniarsaripput.
Ilaatigulli illut nillertissimanerat ajutoortitsisarpoq.
- Illut nillortikkaangamik kiassaatit innaallagiatortut tamarmik sarfamik annertunerpaamik tigooraaniartarput, Nukissiorfiit allapput.
AAMMA ATUARUK Nukissiorfiit: Ajutoortoqartillugu innaallagissiorfitoqqaq Nuummi innaallagiaqartitsivoq
Taamaattoqaraangat sarfaliuutit artukkerneqartarput, qamillutillu.
Pisarnermisullu attavilersuisinnaasimanngillat. Innaallagiaqarfik tamatumani sarfaqarunnaareersimammat, sarfalersuissutinik toqungasunik taaneqartartunut attavilersuiniarsaripput. Tamannalu nalinginnaasumit allaanerujussuarmik ingerlanneqartussaavoq.
Sarfalersuissutillu toqungasunut attaviliiniarneq misilerarneqarnikuunngilaq.
Misilerarneqassappammi, Nuuk innaallagiaqarfiup innaallagiaarunnissaata tungaanut sarfaarutinneqaqqaartariaqarpoq.
Attaveqaqatigiilluartariaqartut - oqarasuaatinut angallattakkanut attaveqarfik qamittoortoq
Sulisut attaveqaqatigiilluarnissaat taamaattoqarnerani pingaarpoq. Tusassimili oqarasuaatinut angallattakkanut attaveqarfik Nukissiorfiillu radiukkut attaveqaataat qamittoormata, aamma attaveqatigiinniarneq ajornakusuulerpoq.
- Tamanna attavilersuisutut inuit attaveqaqatigiissinnaajunnaarnerannik nassataqarpoq, taamaattumillu qanoq iliuuseqarnissaminnik paasiniaallutik ajornartoorfimmi innaallagissiorfimmi nakkutilliisoqarfimmut inuit attavilersuisut biilerlutik orniguttariaqartarput, suliassaq isumagiartortarlugu, kingornatigullu nakkutilliisoqarfimmut uteqqittariaqartarlutik, Nukissiorfiit allapput.
Politiit radiukkut attaveqaatinik kingusinnerusukkut atukkiipput.
Ajornartoornermi sarfaliuutit akunnerni 14-init amerlanerusuni attavilerneqartariarlutik ajortoortarput. Erngup nukinganik nukissiorfik ajornartoornermi sarfaliuutinit taperserneqarluni innaallagiamik nalunaaqutaq 14.03 pilersueqqilerpoq, illoqarfimmullu attavilerneqariartulerluni.
- Sila issinnerusimappat, ajornartorsiorfiunerusimassagaluarpoq
Akunnerit 18-it ingerlareersut kiisami sarfaqaqqilermat, innuttaasut sarfamik atuinertik minnerpaamiitinniarsarissagaat nalunaarfigineqarput.
Sarfaliuutit pisoqalisimasut marluupput. Ataaserlu unittoorami akunnerni arfineq-marlunni iluarsartuunneqartariaqalerpoq. Taamaammat sarfaliuutit sinnerisa artukkerneqarnissaat aarlerissutigineqarpoq.
AAMMA ATUARUK Innaallagissamik pilersuinerup unittoortarnissaa Nukissiorfiit aasarli kalerrisaarutigereerpaat
Artukkerneqanngillalli. Nuulli ulluni taakkunani kialaarsimanngitsuuppat, sarfaliuutip ataatsip unittoornera Nuup sarfaarunneranik sivitsuerataannaagaluarpoq,
- Sila issinnerusimappat, tamatumalu nassatarisaanik illoqarfimmi annertunermik sarfamik atuisoqassappat, pisoqarneq ajornartorsiorfiunerusimassagaluarpoq, Nukissiorfiit allapput.
Nuuk erngup nukinganik nukissiorfimmit 100 procentimik aatsaat decembarip ulluisa pingajuanni pilersorneqaqqilerpoq.
Sarfaarunnermi misilittakkat siunissami assingusumik pisoqassappat iluaqutaajumaartut, Nukissiorfiit allapput.