Nuummiut suli aalajanginngitsut: Partiit marluk isumaliutigaakka
Inuit Ataqatigiit siuariarluni Siumut kinguariarpoq partiiaqqallu Nunatta Qitornai Suleqatigiissitsisullu ilaajunnaassallutik.
Nittartakkatigut nutaarsiassaqartitsiviup, Sermitsiaq.ag-p HS-Analyse suleqatigalugu isumasiuisitsinerata inernerata tamanna takutippaa.
Isumasiuinermili inernerineqartoq allaavoq. Qinersisartullu marlunngorpat qinersinermi taasinerat isumanik aalajangiisoqarnissaanut aalajangiisuussaaq.
AAMMA ATUARUK Isumasiuineq: IA siuariangaatsiartussatut isikkoqarpoq
Rasmus Leander Ilisimatusarfimmi inuiaqatigiilerinermi ilisimatuujusup misissuineq kisitsisillu misissorluarpai.
- Amerlasuut kimik taasissanerlutik suli ilisimanagu akissutigaat, inuiaqatigiilerinermut ilisimatooq oqarpoq.
- Taamaammat qinersisorilerneqartussarpassuupput, aamma qinersisartunik aalajangiisoqartussaavoq.
KNR-ip qinersisartut marluk Nuummi aqqusinermi naapitaasa kina qinissanerlugu suli aalajanginngilaat.
Assi: KNR / Anne Meisner Synnestvedt
- Arlaliugamik suli aalajangeqqissaanngilara. Demokraatit IA-kullu naamik. Sinnerini arlaat, Bolethe Lennert oqarpoq.
Taanna pimoorussilluni qineqqusaartumik taasiniarpoq. Taamaammat qineqqusaartut malinnaavigai, qineqqusaartulli eqqortuinnarnik oqaaseqarsorinagit.
AAMMA ATUARUK Erik Jensen forklarer dårlige tal: Vi ligger altid dårligt i meningsmålinger
- Qineqqusaaraangamik taakkua eqqartorunikkit, qinigaagaangamik iluamik malunnartueruttarami.
Tamanna nalaassimavaa, aalajangersimasumilli peqquteqarnersoq oqaatiginagu. Bolethe Lennertillu sassartunik nutaanik Inatsisartunut isertoqarnissaa aamma neriuutigaa.
- Sassartut nutaat isumalluarnarput. Neriuppunga taakku allannguissasut.
Assi: KNR / Anne Meisner Synnestvedt
Christian Woldsgaardip Brugsenip saani naapitatta qinigassani suli aamma aalajanginngilaa.
- Naamik suli aalajanginngilara, Christian Woldsgaard oqarpoq.
Marlunngorpat qinersinissamut suna aalajangiisuussava?
- Tamaani ineriartortitsilluarusuttoq. Taamaattoq maani maanna ukiorpassuanngortunilu pingaarnersaasoraara, Christian Woldsgaard oqarpoq.
Taannalu inaarutaasumik aalajangiiginnartussaavoq.
- Partiit marluk immaqa pingasut tamakkuninnga pingaartitsisuusoraakka, partiillu sinneri oqaluinnarsoralugit.
- Qineqqusaarnermi pisut tamatumani eqqarsaatigivallaanngilakka, kisianni qinersisitsisoqalernerani uuma cirkusip aallartinnginnerani pisut eqqarsaatigineruakka, Christian Woldsgaard oqarpoq.
Inuusuttut ilaassasut
Christian Woldsgaardillu Bolethe Lennert assigalugu kimik qinersinissani isumaliutiginerlugu tamanut oqaatiginianngilaa.
Urani Kuannersuarnilu aatsitassarsiornissamik suliniut qineqqusaarnermi uani eqqaamasaasa ilagaat.
- Kukkusoqarnersoq kukkusoqannginnersorluunniit isumaqanngilanga. Kisianni qinersinermi matumani oqaluuserinissaa soqutigineqarluarpoq.
- Kisianni nunatsinni uku aalajangerneqarlutik qinersisoqaruni taava anguniagassanngortinneqassapput.
Taassuma inuusuttut siunissamut atatillugu aalajangiinissamut peqataanerunissaat neriuutigaa:
- Utoqqaanerusut tassani aalajangiisartuungaatsiarput. Qujanartumilli partiit ilaanni kinguaariit nikikkiartulerput. Aatsitassarsiornermut siuliniutit taamaattut ilumut piviusunngortinniarnerigut pillugu inuusuttut isummersortuusussaasut isumaqarpunga, Nuummi najugalik Christian Woldsgaard oqarpoq.
