Erik Jensen Siumup kinguariassangatinneqarnera pillugu: Avissaartuunneqartutullusooq oqartoqartarnera inituallaarsimassapput
Inatsisartunut ullumi qinersisoqartuuppat Inuit Ataqatigiit 10 procentpointinik siuariarlutik nunatsinni partiini annerpaanngussagaluarput, katillugit 36 procentinit taaguunneqassagaluarlutik.
Siumut inatsisartunut 2018-imi qinersinermi 27,3 procentinit taaguunneqartoq maanna 23,2 procentinit taaguunneqassagaluarpoq, Namminersornerullutik Oqartussat eqqunneqarneranni Siumut inatsisartuni aatsaat taama ikitsigisunik ilaasortaatitaqalertussatut isikkoqarluni.
Siumullu siulittaasua Erik Jensen oqaruaatikkut maanna attaveqarfigaarput, Erik Jensen, Siumut aatsaat taama ikitsigisunik ilaasortaatitaqalersinnaaneratut isikkoqarnera qanoq nalilerpiuk?
- Isumasiuinermi inernerit soorunami tusaatissatissatut tiguagut, kisiannili tupaallaatiginagit. Qinersineq sioqqullugu misissuinerit taama inerneqartarnerat nutaarsiassaanngitsutut isumaqarfigaarput. Kisianni ajunngitsumik angusaqarnissatsinnut nukivut atorpavut, tassa siulersuisuni qineqqusaartorpassuillu ajunngitsumik angusaqarnissarput pillugu sukataarput, tamanna nuannaarutigisorujussuuarput. Aammalu una oqaatigilaarsinnaavara ukiuni kingullerni qinersinerni Siumut 2013-imi 2014-imi qinersisartui ullumikkumut appariartuinnarsimanerat mumisinniarlugu soorunami suliagut ingerlatiinnassavagut, Siumup siulittaasua Erik Jensen KNR-imut oqarpoq.
Siumut inunnik isumasiuinermi taama angusarissaarpallaannginneranut suut pissutaasinnaappat?
- Assigiinngitsorpassuit pissutaasinnaapput, kisianni Siumut ilumini assigiinngitsunik isummersortuartarnera, kiisalu aamma avissaartuunneqartutullusooq oqartoqartarnera tamakkua aamma inituallaarsimassapput, kiisalu aamma inunnut ataasiakkaanut tunngassuteqartut taakkua aamma qularnanngilaq qinersisartuninngaanniit misissuinerni nalilersuutini aamma taakku ilaatinneqarsimassasut, Siumup siulittaasua Erik Jensen taama oqarpoq.
Demokraatit qinersinermi aamma kinguariartussatut isikkoqarput, Atassutillu marlunnik ilaasortaatitaqarnini attatissallugu.
