Nuummi GUX-imi ilinniartut ministeriunermut Múte-mullu apeqqarissaartut
Danskit ministeriunerat Mette Frederiksen ulluni makkunani nunatsinnut tikeraarpoq.
Ministeriuneq Nuummiinermini Nuummi GUX-imi ilinniartut aamma pulaarpai. Ilinniartunit klassit marluk ministeriunermut Naalakkersuisullu siulittaasuanut apeqqarissaarput.
Apeqqutillumi imaaliallaannarluni akisassaanngitsut alianartunik aallaaveqartut naalakkesuisut siulitaasuannut Katharina Saandvig Qvistimit apuunneqarput.
Nuummi GUX-imi ilinniarnertuunngorniartoq, Katharina Saandvig Qvist
- Naatsorsueqqissaartarfiup kisitsisaatai malillugit nunarsuarmi Kalaallit Nunaanni imminortoqarnerpaasarpoq, tamannalu iliuuseqarfigineqanngippallaartaqaaq, Katharina Saandvig Qvist oqarpoq.
Nunatsinni imminut toquttut ukiuni kingullerni nalunaarsorneqartut amerliartorput. Politiit nalunaarsugai naapertorlugit 2017-imi 41-t imminut toquppuq siornalu 49-t imminut toqussimallutik.
Naalakkesuisulli siulittaasuata akissutaa, Katharina Saandvig Qvistip naammaginartinngilaa.
- Múte akissummini avaqqutaarinnippoq, apeqqutikkalu marluk tamarmik iluamik akineqanngillat paasinninnerarput kisianni qanorpiaq iliuuseqarniarnerminnik oqaaseqanngillat, tassaluuna politikerit taamaattarnerat uanga akueriuminaatsittariga, taanna oqarpoq.
Ilinniartoq alla Uiloq Ingemann Jeremissen, Mette Frederiksenimut Múte B. Egedemullu aamma apeqquteqarpoq.
Taassuma apeqqutaa 50-ikkunni pisimasuuvoq, Kalaallit Nunaat nunasiaataajunnaarluni Danmarkimut ilaalermat. Tamanna 1953-imi inatsisip tunngaviusup allanngortinneqarnerani pivoq.
AAMMA ATUARUK Atuakkiortup Danmark nunarpullu pillugit oqaluttuat qulaajarai
Tassani atuagaq “Imperiets børn” -mut siorna saqqummersumut tunngassuteqarpoq. Atuagaq tusagassiortumit Anne Kirstine Hermannimit atuakkiarineqarpoq.
- Sorsunnersuup aappaata kingorna Kalaallit Nunaata periarfissarigaluarpaa naalagaaffinngornissani, kisianni taamani kalaallit naluaat tamanna periaffissarinerlugu taamanikkummi Danmarkimiit tamatuminnga paasisaqarnissaminnik periarfissinneqannginnamik, Uiloq Ingemann Jeremiassen oqarpoq.
Ministeriunerummi akissutaa qanoq igiviuk?
- Pikkunaagilaarpara, apeqqummi pineqartoq itinerujussuugaluarpoq, Uiloq Ingemann Jeremiassen oqarpoq.
Mette Frederiksenip apeqqutigineqartut nuannaarutigai
Ilinniarnertuunngorniat apersuinissaminnut piareersarluarsimanerat, ministeriunermit Mette Frederiksenimit maluginiarneqarput.
- Nuannerluinnarput assorsuarlu inuusuttunnguit pikkorilluinnarlutik apersuipput, malugisinnaavara nutaarsiassanut malinnaalluartarsimasut ilisimasarialinnillu qaammaasimasaqarluartuusut, apeqqutigisaallu akiuminaapput inornangajappulluunniit, taamatullu periarfissinneqarsimagama nuannaarutigisorujussuuara, Mette Frederiksen KNR-mut oqarpoq.
Naalakkersuisut siulittaasuat, Múte B. Egede tamassuminnga isumaqataavoq.
- Inuusuttut pikkorissut aammalu nunarsuarmut pissutsinut qanimut malinnaasut nunaminnullu aamma qanimut malinnaanerminnik oqariartuuteqartut apersuisullu nuannersorujussuarmik misigisaqarfigivagut, Mùte B. Egede KNR-mut oqarpoq.
