Nuummi atuartoq coronavirusimik tunillanneqarsimasoq
Allaatigisaq una nalunaaqutaq 10:57 nutarterpoq: Atuartoq tunillanneqarsimaneragaagaluartoq tunillanneqarsimanngitsoq erserpoq. Atuartoq taanna pingasoriarluni misissortissimavoq. Covid-19-imik tunillanneqarsimasoq misissortinnerani siullermi erserpoq, tunillanneqarsimanngitsorli misissortinnerini kingullerni marlunni erserluni.
Nuummi atuartoq coronavirusimik tunillanneqarsimasoq paasineqarpoq.
Nunatta nakorsaanera Henrik L. Hansen KNR-imut taama oqarpoq.
Atuartoq Danmarkimi napparsimmavimmut suliaritikkiartorluni ippassaq marlunngornermi aallarpoq. Danmarkimi napparsimmavimmut uninnginnermini coronavirusimut misissortippoq, tunillanneqarsimasorlu paasineqartoq, nakorsaaneq ilisimatitsivoq.
Ilumullu tunillanneqarsimanersoq paasiniarlugu misissorteqqittussanngorpoq.
Atuartoq taanna, KNR-ip paasisai naapertorlugit, Nuussuarmi Kangillinnguit Atuarfianni 4. klassemi atuartuuvoq.
- Susoqassanersoq nalunaaquttap akunneri arlaqanngitsut qaangiuppata paasissavarput. Paasereerutsigullu nalunaaruteqaqqissaagut, Henrik L. Hansen KNR-imut oqarpoq.
KNR atuarfimmiit oqaaseqatitsiniaraluarpoq, sulili iluatsinngitsumik.
Atuartoq taanna nunatsinni coronavirusimik tunillanneqartutut paasineqartut 20-raat. Tunillanneqarsimasutut paasineqarnikut allat 19-it peqqisseqqittutut nalunaarutigineqareerput.
Kangerlussuarmi kingullermik tunillanneqarsimasoqarpoq. Tunillanneqarsimasoq taanna timmisartumut ilaasartaataanngitsumut ilaalluni nunamit allamit nunatsinnukarsimavoq.
Inullu taanna peqqisseqqittutut ippassaq marlunngornermi nalunaarutigineqarpoq.