Nuuk, Paamiut Maniitsorlu anoraasuarujussuassasut
DMI-p nunatta kitaani Nuummi, Paamiuni Maniitsumi nunaqarfinnilu marlunngornermi anoraasuarujussuarnissaa aarlerisaarutigaa.
Nuummi Paamiunilu atuarfiit ulluuneranilu paaqqinnittarfiit ammassapput, ajornanngippalli angajoqqaat meeqqaminnik angerlarsimatitsiinnarnissaat kaammattuutigineqarpoq. Kommuneqarfik Sermersooq tusagassiuutinut nalunaarummi taama allappoq.
Angajoqqaat meeqqami atuariartortinnissaat angerlaqqinnissaallu aarlerinannginnersoq nammineerlutik nalilissavaat, bussit sila pissutigalugu unissinnaanerat pingaartumik eqqarsaatigalugu.
Paaqqinniffiilli anorersuarnerata nalaani matugaluarpata meeqqanik anisitsisoqarnavianngitsoq kommunip erseqqissaatigaa.
Kommunip allaffiini kiffartuussiviinilu sulisut suliartorsinnaappata taakku anorersuarnerata nalaani ammassapput. Qeqertarsuatsiaani kommunip allaffia matoqqassaaq.
Sakkortuumik anoraasuassasoq
Paamiuni sakkortuumik anorlernera Maniitsumut Nuummullu ullaap tungaani ualimullu apuukkiartussasoq, Paamiunilu qatsoriartussasoq DMI-p nittartakkamini allappaa.
Nuummi anorlernera anorersuarujussuanngorsinnaallunilu anoraasuarujussuanngortarsinnaavoq.
Tamatuma saniatigut sumiiffinni amerlasuuni nittaangaatsialissaaq, taamaammat anorlerneranut atatillugu persingaatsiarnissaa naatsorsuutigineqarsinnaavoq.
Pigisat teqqajasut
Kalaallit Nunaanni Politiit suliffeqarfinnut sanaartorfinni eqqaannilu isumannaallisaanermik isumaginninnissamik kaammattuipput, pigisammi teqqajasut inunnut allanut ulorianarsinnaammata.
Paamiuni, Nuummi Maniitsumilu inuit pigisaminnik aamma isumannaarsueqquneqarput. Umiatsiaatillillu angallatiminnik pituttuilluaqquneqarlutik.