DMI: Anorersuarujussuaq erseqqarlutsitsingaatsiartoq Nuummut takkutilersoq

Nuummi anorersuaq sekundimut 30-miit 35 tikillugu sakkortutigisoq ullumi nalunaaqutaq qulit aqqarngup missaani takkutissaaq.

Nuummi silasiorfiup DMI-p tamanna KNR-imut ilisimatitsissutigaa.

- Anoraap sakkortusinerpaaffiani nittaattussaammat erseqqarlungaatsiassaaq, taanna oqarpoq.

Nuussuarmiit Qinngutta tungaanut aqqusinermi biilit angallattut ingerlanaveeratarsinnaanissaat Kalaallit Nunaanni politiit ippassaq marlunngornermi aarlerisaarutigereerpaat.

- Biilit unittarput, taamaalillunilu aqquserngit aputaajarneqarnissaat unittoortarlunittaaq. Taamaattoqartillugu tulleriiaartut amerlasuunngorsinnaasarput, Kalaallit Nunaanni politiit Facebookimut quppernerminnut ippassaq allapput.

Anorersuarujussuaq ualikkut arferngup missaa sakkukilliartulissasoq silasiortup ilimasaarutigaa.

Silarluup Paamiut, Nuuk Maniitsorlu aqqusaassavai.

Paamiuni quleqeqqata missaani sekundimut 15 miiterit angullugit anorersuarpoq, ulloqeqqatali missaani sakkukilliartoqqilissalluni.

Kalaallit Nunaanni politiit ilimasaarinerat naapertorlugu Maniitsumi aamma anorersuassangatinneqarpoq, Nuummitulli sakkortutiginavianngilaq.

- Maniitsumi maanna unerisimavoq. Kujasimmiilli sekundimut 15 miiterit angullusit anorlerumaarpoq, Hans Wanner oqarpoq.