Atassut Demokraatillu isumaqatigiittut: Nuuk Imerup tunniutiinnarnera uggornarpoq

Nuuk Imerup kisermaassiunnaartussanngornera peqqinnartuusoq, Demokraatit Atassullu isumaqarput. Piginneqatigiiffiulli pisunut malinnaanani tunniutiinnarnera uggornartoq, partiit taakku aamma isumaqarput.

Allattoq Rune Hvistendal Kristiansen

maajip 04-at 2023 07:19

Nuuk Imeq decembarip 31-ani matuguni sulisumik kingulliit inuulluaqqussavai.

Nuuk Imerup matuneratigut nunatsinni kisermaassilluni immiorfiutigisumik sodavandiliorfeqarunnaassaaq – tamannalu Demokraatit ajorinngilluinnarpaat:

- Soorunami uggornartuuvoq Nuuk Imerup matuneqarnissaa aalajangiunneqarsimasoq. Kisianni ajorinngilarput tunngavia, tassa unammilleqatigiinnermik pilersitsisoqarnissaanik aalajangiisimanerit, aamma atuisut pitsaanerusumik akikinnerusumillu pissarsiaqarsinnaanerat pingaartikkatsigu, Demokraatit siulittaasuat Jens-Frederik Nielsen oqarpoq.

Aamma atuarukNuuk Imeq matulersoq

Atassullu isumaqataavoq:

- Kisermaassineq peqqinnartuunngisaannarpoq. Kisermaassineq inuiaqatigiit ingerlarnganik kinguarsaataavoq. Kisermaassisoqartillugu akit aqunneqarsinnaasarput ataasiinnarminngaanniit, tamannalu niueqatigiinnermik aserorterutaavoq, taamaattumillu aamma tupinnartuunngilaq uagut puiaasat pillugit inatsisissaq illersussagutsigu, Atassutip siulittaasua Aqqalu Jerimiassen oqarpoq.

Puiaasat pillugit inatsisissaq matusussanngorneranut peqqutaasoq

Puiaasat pillugit inatsisissaq 2024-mi januaarip aallaqqaataani atuutilerpat, puiaasat allat qillertuusallu nunanit allaneersut nunatsinnut eqqunneqarsinnaalissapput. Nuuk Imerli unammillerteqarnerulersinnaangitsoq, sodavandiliorfimmik piginnittut isumaqarput.

Tassa puiaasat pillugit inatsisissaq Nuuk Imerup matusussanngorneranut peqqutaavoq.

NUUK IMEQ AAMMA INATSIT NUTAAQ:

- Nuuk Imeq immiaaqqanik imeruersaatinillu tunisassiorfiuvoq, taanna Royal Unibrewimit, Carsbergimit Kommuneqarfik Sermersuumiillu pigineqarpoq.

- Puiaasat pillugit nalunaarut aappaagu januaarip aallaqqaataani allanngortinneqassaaq. Tamanna pissutigalugu immiaaqqanut sodavandinullu puiaasat pillugit malittarisassat nutaanngortinneqassapput.

- Tassa imaappoq Nuuk Imerup kisermaassisuunera atorunnaarsinneqassaaq, tassami immiaaqqat sodavandillu qillertuusanik, plastinik igalaaminernillu assigiinngitsunik puiaasanik utertinneqarsinnaasunik pooqartut tuniniarneqarsinnaalissapput.

- Nuuk Imerup maqiteriviup matoqaratarsinnaanera aarlerigisimavaa. Qillertuusat, plastit igalaamerngillu puiaasat siunissami atorneqalersut utertinneqarsinnaanissaannut utertitseriaaseq nutaaq aamma atuutilertussaavoq.

Allisiguk

Tamannalu Faxe Kondit nunatsinneersut nioqqutaajunnaarnerannik kinguneqassaaq, Nuuk Imermi taakkuninnga 2023-p naanerani naggammik maqiterissammat.

Akiuutinngitsoq

Nuuk Imerup tunniutiinnarnera uggornartoq, Demokraatit Atassullu isumaqarput – ingammik piginneqatigiiffiup ukiuni kingullerni sinneqartooruteqarluartarnera eqqaassagaanni. Tassami 2022-iinnarmi 52,2 millionit koruuninik sinneqartooruteqarpoq.

Aamma atuarukNuuk Imeq millionilikkaanik sinneqartooruteqaraluarluni akitsuilersaartoq

- Naatsorsuutigisimanngilarput ingerlaannaq tunniutiinnartoqassasoq. Naatsorsuutigisimavara suliffeqarfik killeqanngitsumik niuernissami arlaatigut aaqqiiffigalugu, arlaatigulluunniit allanngortilaarlugu, inuiaqatigiinni suli iluaqutaanissaa qulakkeerneqassagaluartoq, Jens-Frederik Nielsen oqarpoq.

Nuuk Imeq sinneqartooruteqartareertoq ersarimmat inammilleqatigiinnerup silarsuaani nalimmassaannartussaanera toqqammavimmini peqqinnartuugaluartoq, Aqqalu Jerimiassen isumaqarpoq.

Taamaammat Nuuk Imerup tunniutiinnarnera taassuma paasisinnaanngilaa:

- Uagutsitupajaaq inoqqortussusillit qiviarutsigit, namminneq sodavandiliatik tulluusimaarutigalugit tuniniagarivaat, akilersinnaalluartumik. Uagunana pikkorluppallaaginnartugunaasiit tassani niueqatigiinnermik eqqarsartoqalermat tunniutiinnartoqareerpoq. Killormuusussaagaluarpoq, niueqatigiinneq pulasussanngormat eqqarsarsimasinnaagaluarput, qanoq taava uagut pitsanngussaagut, Aqqalu Jerimiassen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.