Nuuk Imeq matulersoq

Immiaaqqanik, sodavandinik imeruersaatinillu allanik naggataamik 2023-mi decembarip ulluisa 31-anni maqiterisoqassaaq.

Nuuk Imermimmi piginnittut Nuuk Imeq A/S-ip atorunnaarsinneqarnissaa siulersuisuni ullumi ataatsimiinnerminni aalajangerpaat.

Puiaasat pillugit inatsit nutaaq 2024-mi januaarip aallaqqaataani atuutilerpat maqiterilluni nioqqutissiornertik ingerlatiinnarneqarsinnaanngitsoq siulersuisut nalilerpaat.

- Siulersuisut ajuusaaraluaqalutik akueriinnartariaqarsimavaat tamanna periarfissaanngimmat, suliffeqarfiullu ukiuni 40-ngajanni nunatsinni tunisassiorsimanera unittariaqalersoq, Nuuk Imeq tusagassiuutinut nalunaarummi allappoq.

Siulersuisut Nuuk Imerup 2024-mi januaarip aallaqqaataata kingorna ingerlatiinnarneqarnissaanut periarfissat tamarmik misissorneqarsimanerarpaat.

Puiaasat pillugit inatsit nutaaq pisuusoq

Nunatsinni nioqquteqarfiit annertussusaat pissutaanerpaavoq, siulersuisummi oqarnerat naapertorlugu puiaasat igittakkat eqqussorneqarsinnaalernerisigut nunatsinni tunisassiorsinnaaneq akilersinnaajunnaassaaq.

- Nuuk Imermi tunisassioriaaseq allanngortinniarneqaraluarpat ataasiaannartakkanik puulinnik tunisassiulerluni, tamanna imminut akilersinnaassanngilaq tassami qillertuusat imaqanngitsut immigassanngorlugit Nuummukaannissaat, qillertuusanut imaqareerlutik eqqunneqartunut tunisassiorfinniit Danmarkimiittunit imaluunniit allaniittunit, annertunerujussuarnillu tunisassiortartunit, naleqqiullugit unammillersinnaassaanngimmata, tusagassiuutinut nalunaarummi allassimavoq.

Inatsisartut aalajangernerat ataqqillugu siulersuisut allapput.

Tamatumali saniatigut Nuuk Imerup periusissiatut toqqarneqartoq nammineq isumartik malillugu iluatsilluarnerpaasumut taarsiutigineqarnera ajuusaarutigaa.

- Massakkut iluatsilluartumik utertitsisarluni atuuttumut 98%-it sinnerlugit utertitsiviusartumut taarsiuttussanngorpat, tamannalu aamma Atlantikoq ikaarlugu assartuingaatsiartariaqalernermik kinguneqartussaavoq, Nuuk Imeq allappoq.

Nuuk Imermi sulisut aalajangiineq pillugu paasissutissiiffigineqarput.

Siulersuisut suliffeqarfiup sulisuisa 40-t sinneqartut soraarnissaat pillugu sapinngisaminnik iliuuseqarsimallutik tusagassiuutinut nalunaarummi allappaat.