Nuuk Imeq millionilikkaanik sinneqartooruteqaraluarluni akitsuilersaartoq

Sinneqartoorutit 52,2 millionit koruunit.

Nuuk Imeq 2022-mi taama sinneqartooruteqartigisoq, nalunaarusiaani kingullermi ippassaq pingasunngornermi akuerineqartumi erserpoq. Taakkua 2021-mi sinneqartoorutaaniit ikinnerupput, taamanimi sinneqartoorutai 56,5 millionit koruuniummata. Kisianni 2018-iminngarnit, 2019-iminngarnit 2020-minngarnillu sinneqartooruteqarnerulluni.

Sinneqartoorutai piginnittut agguagarsiarissavaat. Kommuneqarfik Sermersooq, 36,28 procentimik piginnittuusoq, 18,9 millionit koruuninik agguagarsissaaq. Sinneruttullu Carlsberg Breweries A/S-ip Royal Unibrew A/S-illu, tamarmik immikkut 31,86 procentimik piginnittuusut, agguagarsiarissavaat.

Nunarsuarmi 2022-mi pisut pissutaallutik aningaasartuuteqarnerunermigut kinguaattoorsimagami akitsuilaarsimasoq, Nuuk Imerup ukiumoortumik nalunaarusiaani allaqqavoq. Kinguaattorutinullu suli aningaasartuuteqarallassalluni.

Nuuk Imeq ukiumoortumik nalunaarusiamini ima allappoq:

"Nioqqutissiassat tunisassiornermilu ikorfartuutit pisiortortakkatta akii minnerunngitsumillu nassiussinermi assartuinermilu akit upernaaq akitsuereernitsinni ajoraluartumik qaffangaatsiaqqipput. Taamaammat 2022-mitulli akitsueqqilaartariaqassangavugut."

Tassa Nuuk Imeq sinneqartooruteqarluaraluartoq, tamanna immiaararsininni sodavandisininniluunniit maluguusuuteqarfiginavianngilat.

3,5 procentimik marsimi akitsuereersimallutik, Nuuk Imerup pisortaa Bernhard Christensen ilisimatitsivoq. Akitsueqqinnginnissartillu nersiorsuutigisinnaanagu, taanna aamma oqarpoq.

Millionilikkaanik sinneqartooruteqaraluartoq immiaaqqanik sodavandinillu akitsuinera pisisartunit tupigusuutigineqassappat paasisinnaaviuk?

- Naagga, paasisinnaanngilara. Brugsenimmi nioqqutai allat aamma akitsornikuupput. Sodavandiliorfillu sinneqartooruteqaraluarluni akitsuisunut sooq ilaasinnaassanngila?

Ima aningaasartuuteqarnerutigaa, allaat sinneqartoorutit 52 millionit koruuniusut matussusiinissamut naammannatik?

- Naagga, qanorli aningaasartuuteqartiginera aallaavigalugu nalimmassaasariaqartarpugut. Nioqqutissiassat, tunisassiornermi ikorfartuutit ilaalu ilanngullutik akitsornikooqaat, taanna KNR-imut oqarpoq.

Unammillerteqarnerulernissaq nalorninartorsiortitsisoq

Namminersorlutik Oqartussat puiaasat pillugit nalunaarutaa kingusinnerpaamik 2024-mi januaarip aallaqqaataani atorunnaassasoq akuerineqarpoq. Tassa Nuuk Imeq nunatsinni kisermaassiunnaaruni unammillerteqarnerulersinnaavoq. Tamannalu Bernhard Christensenip qiimmaatsaatiginngilaa:

- Ilungersunaqaaq. Tamanna Nuuk Imeqarunnaarneranik kinguneqarsinnaavoq. Nioqqutissiornikinnerulerutta ataannarnissamut tunngavissaqarpiarunnaasssaaq, taanna oqarpoq.

Unammillerteqarnerulernerup aningaasaqarnermut sunniuteqarnissaa sillimaffiginiarlugu akitsuiniarpisi?

- Naagga. Ukiunili kingullerni sinneqartooruteqarluartarnera inerisaanermut sivisuumik aningaasaliissuteqannginneranik soorunami aamma peqquteqarpoq. Aningaasaliissuteqanngikkaannimi aamma nalikilliliinissaq pisariaqarneq ajorpoq. Tamannalu sinneqartooruteqarluaataasarpoq, Bernhard Christensen KNR-imut oqarpoq.

Nuuk Imeq 2023-mi 204 millionit koruunit missaannik kaaviiaartitaqarnissamik ilimasuffimmini akileraannginnermi 40-45 millionit koruuninik angusaqassangavoq.

Nuuk Imeq 44-nik aalajangersimasumik atorfiliusunik Nuummi massakkorpiaq sulisoqarpoq.