Nuuk Imermi siulittaasoq: Tunniutiinnanngilagut
Nuuk imerup siunissaa nalorninartorsiorfiusoq pillugu Nuuk Imermi siulersuisut siulittaasuat Kuupik Kleist akiuuppoq,
Inatsisartummi immiiaaqqat sodavandillu puui pillugit, puiaasaaqqanillu utertitseriaaseq pillugu nutaamik inatsisiliorniarput, aappaagu januaarip aallaqqaataaniit atuutilersussamik.
- Nuuk Imerup ingerlaannarnissaa pillugu siulersuisuni periarfissat tamaasa misissorpagut, tunniutiinnanngilagullu, taanna oqarpoq.
Nuuk Imeq inatsisissarlu nutaaq:
- Nuuk Imeq immiaaqqanik sodavandinillu maqitsisarfiuvoq Royal Unibrewimit Carlsbergimit aammalu Kommuneqarfik Sermersuumit pigineqartoq.
- Kingusinnerpaamik aappaagu jannuaarip aallaqqaataani inatsit nutaaq atuutilissaaq. Tamannalu puiaasaaqqanik utertitseriaatsimut allannguisussaavoq.
- Imaappoq Nuuk Imerup kisermaassineranut kalluaassaaq sodavandit immiaaqqallu qillertuusanngorpata aammalu utertitseriaaseq allanngortinneqarpat.
- Nuuk Imerup ernummatigaa, suliffeqarfiup matoratarsinnaanera.
Nuuk Imeq immiaaqqanik sodavandinillu nunatsinni maqitsisarfiuvoq 50-llu missaanni sulisoqartoq. Inatsisissarlu nutaaq siunissami atorneqarumaartussaq Nuup imerup siunissaanut apeqqutaalluinnartussaavoq.
AAMMA ATUARUK Nuuk Imermi pisortaq: Nuuk imeq matorataannaavoq
Tamatumalu nalorninartumeerusaartuarnera siulersuisut siulittaasuannut aalassatitsivoq.
Annilaanngatigineqarpormi unammillerneq qaffassagaluarpat suliffeqarfiup matoratarsinnaanera.
Nuuk Imerup pisortaa Bernhard Christensen siusinnerusukkut KNR-mut ilaatigut ima oqarpoq:
- Immiiaaqqat sodavandillu puui pillugit, puiaasaaqqanillu utertitseriaaseq pillugu nutaamik inatsisiliortoqarpat, Nuuk Imermut kingunerlutsitsisussaavoq, ullumikkutummi maqitsisarnermiit annikinnerusumik maqitsisalissagutta nunaniillu allaniit maqitanik tikisitsisoqartalerpat tamanna Nuuk Imerup nammassinnaanngilaa matuneranillu kinguneqaratarsinnaavoq, taanna oqarpoq.
Atasariaqarpoq
Siulersuisut siulittaasuat Kuupik Kleist sapinngisani tamaat atorlugu suliffeqarfiup ingerlaannarnissaa siunertaralugu Inatsisartut aalajangiunniagaannik sunniiniaraluarpoq, taannami isumaqarpoq suliffeqarfik nunatta aningaasaqarneranut pingaaruteqarluinnartuusoq, Kommuneqarfik Sermersoormi Namminersorlutillu Oqartussat akileraarutitigut Nuuk Imermiit iluanaangaatsiartarput:
- Nuuk Imeq Kommunemut Namminersorlutilllu Oqartussanut akileraartarpoq, suliffeqarfiuvoq iluatinnartoq, maqitsinerimmi nunatsinni ingerlanneqartarput, inunnillu 50-t missaanni suliffigineqarpoq, Kuupik Kleist oqarpoq nangipporlu:
AAMMA ATUARUK Nuuk Imeq piginnittunut millioninik nutaanik sinneqartoortitsisoq
- Kommuneqarfik Sermersooq 20 mio. koruunit sinnerlugit sinneqartoorutinit Nuuk Imermiit iluanaartarpoq taamatuttaaq Namminersorlutik Oqartussat ilunaartarpoq, sulisullu 50-t sinneqartut aamma Kommunemut akileraartartuupput, taanna oqarpoq.
Taanna aamma isumaqarpoq unammillernikkut qaffaasoqarpat tassa avataaniit killeqanngitsumik imeruersaatinik eqqussuisoqalissappat tamanna taamaallaat Nuuk Imermuinnaq tunnavianngitsoq aammali illoqarfinni maqitsivinnut tuttussaasoq.
Kuupik Kleistip Namminersorlutik Oqartussat akissutissaa utaqqiinnarpaa taamaalillunilu Nuuk Imerup siunissaa qanoq ikkumaarnersoq paasinarsissaaq.
