Nuuk: Allakkatigut taasisut qinersinerit siuliinit marloriaammik amerlanerusut
![](/sites/default/files/styles/image_934x467/public/article_images/brugsenimi_qinersineq.jpg?itok=0-0CbyvV)
Nuummi innuttaasut marlunngorpat qinersinernut allakkatigut taasereernissaminnut marsip ulluisa 31-ata tungaanut periarfissaqarput.
Inuillu katillugit 1.554-it allakkatigut taasisimapput, taakkualu kommunimut, Inatsisartunut ilagiillu sinniisaannut taaguussineri katillugit 3.198-iullutik. Illoqarfiit pingaarnersaanni nunaqarfinnut aqutsisoqanngimmat, taakkununnga taaguussinerit uani ilaanngillat.
Illoqarfiit pingaarnersaanni innuttaasut allakkatigut taasisut qinersinerit siuliinit amerlanerujussuusut, Kommuneqarfik Sermersuup attaveqaqatigiinnermut pisortaa Lars Damkjær KNR-imut oqarpoq.
- Allakkatigut maanna taasisimasut nalinginnaasumik qinersinerniit marloriaatip pingasoriaatillu akornannik amerlanerusut missiliorparput, Lars Damkjær oqarpoq.
AAMMA ATUARUK Silarluk, nittaak imaliliornerlu aqqusaarlugu taasivissat anngupput
Inuit qinersivinni amerlavallaannginniassammata, kommunip siusissukkut taasinissamik kaammattuuteqarnera tamatumunnga pissutaanersoq oqaatigiuminaappoq.
- Suna pissutaanersoq soorunami oqaatigiuminaappoq, aamma qinersinerit maanna arlaliummata.
- Kisianni inuit taasiniarlutik innuttaasunik kiffartuussivimmut saaffiginnittut oqaloqatigereerlugit coronavirusimut atatillugu killilersuinerit pissutigalugit ullormi qinersivimmi ornigullutik qinersiartunnginnissamik kaammattorneqarnertik malillugu allakkatigut taasinissamik aalajangersimasoraagut, Lars Damkjær oqarpoq.
Suli amerlanerusut allakkatigut taasisimanissaat neriuutigigaluaraat
Sulili amerlanerusut qinersineq sioqqullugu allakkatigut taasisimasuuppata ajornavianngikkaluartoq, Damkjær oqarpoq.
- Marlunngorpat qinersititsinissaq ajornannginnerussagaluarmat, amerlanerusut allakkatigut taasinissaat kissaatigigaluarparput. Allakkatigulli taasisimasut nersualaarujussuarpagut, attaveqaqatigiinnermut pisortaq oqarpoq.
Allakkatigut taaguussinerit qinersinerup ullua sioqqullugu apuunneqarniassammata, qinersisartut taasinissartik namminneerlutik akisussaaffigaat. Poorskertussaammallu kommunip Nuummi allakkatigut taasisarfiit matoreerpai.
- Kommunimi suleqatitsinnik allakkatigut taasinernik katersiartortitsilluta poorskimi pisiniarfinnukartitsinnginnissarput aalajangerparput. Taamaammat pingasunngormat allakkatigut taasinissamut periarfissaq kingulliuvoq, Lars Damkjær oqarpoq.
- Inatsisartunut, kommunimut, ilagiit sinniisaannut nunaqarfinnilu aqutsisunut marlunngorpat apriilip ulluisa arfernanni qinersissaagut.
- Nunatsinni qinersivissat katillutik 72-iupput.
- Taasivissat Nuummiit nassiussat apuuffissaannut ullut unnuallu qulit iluanni tikiunneqarput.
- Ulloq qinersiffissaq sioqqullugu allakkatigut qinersisoqassasoq nunatsinni taasisinnaatitaasunut tamanut kaammattuutigineqarpoq. Coronamik nunatsinni qaammat ilivitsungajak tunillatsissimasoqanngikkaluartoq coronallu nunarsuaq tamakkerlugu tuniluunnnerata ajornartoortitsinera peqqutaalluni aamaaliortoqarpoq.
- Qinersivissat ullaakkut nalunaaqutaq qulingiluaniit unnukkut nalunaaqutaq arfineq-pingasut tungaannut ammassapput.
- Nunatsinni innuttaasuni taasisinnaatitaasut 41.000-t missiliorpaat.
- Inatsisartunut ilaasortanngortussatut qinikkat 31-usarput. Inatsisartunut qineqqusaartut 189-iupput.
- Kommuninut ataasiakkaani tallimaasunut qineqqusaartut katillutik 254-iupput.