NUTARTIGAQ: Angut inuusuttoq Sisimiuninngaanneersoq nassaarineqarpoq
Nutartigaq tallimanngorneq nal. 15.25:
Inuit marluk maqaasineqartut ajunngitsut sumiissusersineqarput. Taamaattumik ujaasineq annaassiniarnerlu tallimanngorneq nal. 13.15 unitsinneqarpoq. Taana Issittumi Sakkutooqarfik Facebook-imi quppernermini ilisimatitsivoq.
Issittumi Sakkutooqarfik politiit aamma innuttaasut, @air greenland's EC 225 helikopterii, sakkutuut timmisartortartuinit Hercules aamma Icelandic Coast Guard, Aasiaat Radio annaassiniarnermi peqataasimapput.
Itillip Sisimiullu akornanni ujaasineq annaassiniarnerlu SAR tallimanngornerup unnuaani aallartinneqarpoq. Kalaallit Nunaanni Politiit pigaartuisa pisortaat, Preben Kleist paasissutissiivoq.
Politiit maqaasineqartup ilaqutaanit nalunaaqutaq unnuap-qeqqata kingorna, nalunaaqutaq 00.40 saaffigineqarput. Ujaasinerlu annertooq politiit angallataannik, qulimiguulimmik namminerlu kajumissutsiminnik ujaaseqataasunit peqataaffigineqartoq aallartinneqarluni.
John Dahlip POCA 505 qaqortoq, motoori 90-inik hestekraftinik sakkortussusilik atorlugu aallarsimavoq. Taanna sisamanngornermi ullup ilaani Sisimiunut aallarsimavoq, kingornali attaveqarfigineqaqqigani, pigaartut pisortaat paasissutissiivoq.
Politiit oqaarnerat naapertorlugu niviarsiaraq 16-inik ukiulik umiatsiami ilaasimasinnaavoq, tamannali suli uppernarsarneqanngilaq. Politiit pisunik erseqqissaaniarsaripput.
- Innuttaasut, pingaartup Itillip Sisimiullu akornanni angalasut alaatsinaannissaannik aamma paasissutissaateqarunik soqutiginaateqarsinnaasumilluunniit takusaqarsimagunik politiinut attaveqarnissaannik kaammattuuteqarfigaagut, Preben Kleist oqarpoq.
Sisimiuni politiit 70 13 22-mut attaveqarsinnaapput. Aamma Kalaallit Nunaanni Politiit 70 14 48-mut attavigineqarsinnaapput.
