Nutaarsiassaqarnermik pisortap suiaassutsit amerlassusiliiffigerusunngikkallarai

Kalaallit tusagassiorfiisa tusarfigisartagaasa pingajorarterutaat arnaapput, naalli nunanut allanut sanilliullugit amerlanerugaluartut, KNR-ip nutaarsiassaqartitsinermi pisortaa naapertorlugu tamanna pitsanngorsarneqarsinnaavoq.

- Naak nalunaarusiaq naapertorlugu nunanut allanut sanilliulluta pikkoringaatsiaraluarluta ulluinnarni sulinitsinni iliuuseqarnerusinnaanersugut takorusuppara, Mikkel Bjarnø Lund oqarpoq.

Taamaammat nalunaarusiaq Tusagassiuutit 2018 tusaatissatut tiguaa Innuttaasunillu sullissisussaalluni tusagassiuuteqarfiup qanoq iliornikkut arnat tusarfittut atorneqartut amerlanerusinnaaneri misissussavaa.

AAMMA ATUARUK Nunatsinni tusagassiorfinni arnat takussaangaatsiartut

Arnalli qanoq amerlatigisut nutaarsiassani peqataasarnissaannut amerlassusilersuissanerluni, nutaarsiassaqartitsinermi pisortap maannakkuugallartoq isummerfigerusunngilaa.

- Apeqqutip akisiutissarsiniartarnissaa nakkutiginiarlugu maannakkumuugallartoq neriorsuutigisinnaavara, tassalu tusarfiit pitsaanerpaat naleqqunnerpaallu nassaariniartassagigut, tamannalu aallaqqaammut pingaarneruvoq, Mikkel Bjarnø Lund oqarpoq.

Taanna kalaallit tusagassiorfiinik misissuinermik oktobarip naanerani saqqummiunneqartumik suleqataasumit, Signe Ravn-Højgaardimit taperserneqarpoq.

- Tusarfiit eqqartukkamut ilisimasaqarnissaat qanoq suiaassuseqarneraniit uanga pingaartuutippakka. Inuiaqatigiinni Kalaallit Nunaannitulli ikittuni tusarfinnik pissarsiniarneq ajornakusoorsinnaasarpoq, Signe Ravn-Højgaard oqarpoq.

Signe Ravn-Højgaardilu oqarnera naapertorlugu Tusagassiuutit 2018-ip kalaallit tusagassiorfiinik qanoq ittuunerinik misissuineruvoq, tusagassiorfinnut isornartorsiuinerunngitsoq.

- Tusagassiorfiit qanoq inneri takorusuppagut, taamaammat uuttuutit assigiinngitsut atorlugit misissorpagut unalu tamakkua ilagaat. Allanngorujussuassaguni soqutiginarpoq, Signe Ravn-Højgaard oqarpoq.