Nutaamik agguaasseriaaseqalernissaq KNAPK-mit neriuutigineqarpoq
![](/sites/default/files/styles/image_934x467/public/article_images/kutter_ved_isbjerg_foto_branding_greenland_630_0.jpg?itok=nDXEdwbf)
Ukioq manna kitaani raajartassat 73.000 tonsinut ikilineqassapput. Ukioq mannalu pisassiissutigineqartut ukiup siulianut sanilliullugit 14 procentimik annikinnerussapput.
Tamannalu ajuusaarnartoq Inatsisartuni Aalisarnermut Ataatsimiititaliami siulittaasoq, Siumuminngaanneersoq, Nikolaj Jeremiassen isumaqarpoq.
- Ataatsimiititaliamilli oqaatigineqassaaq uumasoqassutsimik ilisimasallit siunnersuinerat raajarniat raajartassat annertussusiannik siammasissusiannillu naliliinerannit allaanerummat. Taamaattumik aalisartut misilittagaasa ilisimasaasalu ullumikkornit annertunerusumik siunissami ilaatinneqartarnissaat pingaaruteqartoq, Nikolaj Jeremiassen tusagassiutinut nalunaarummi taama allappoq.
Aamma atuaruk Raajartassiissutit ikilineqarneri raajarniat ilaasa akiliisinnaajunnaarnerannik kinguneqarsinnaasoq
Aalisartut uumassusilerisullu Aalisarnermut Siunnersuisooqatigiinnit tusarniarneqareertut erserpoq. Imminnummi naapeqatigiillutik pisassiissutissatut siunnersuutigineqartut annertusineqassasut isumaqitigiissutigisimammagit.
- Uumassusilerisut pisassiissutissatut siunnersuutaat appasippallaarmata, Aalisarnermut Siunnersuisooqatigiit aqqutigalugit pisassiissutigineqartut annertusinissai isumaqatigiissutigivarput, tamannalu iluatsimmat naammagisimaarnarpoq, KNAPK-mi pisortaq Petrus Biilmann, KNR-imut taama oqarpoq.
Siunissami avinnissaat piumaneqartoq
Uumassusilerisut raajartassiissutit siullermeerlutik 60.000 tonsit siunnersuutigeqqaarsimagaat taassuma oqaatigaa. Aaqqiissuteqaraluarlutillu tamanna naammaginanngitsoq oqaatigaa, sinerissap qanittuani raajarniat pisassakippallaarmata.
Neriuutigaalu aalisarnermut naalakkersuisup, Karl Kristian Krusep, tulliani aalisarnermut inatsisiliornermi sinerissap qanittuani aalisartut piumasaat tusaaniarumaarai. Maannakkummi aaqqissuussineq malillugu sinerissap qanittuani aalisartut raajartassat 43 procentii pigivaat, 57 procentillu suliffissuarnit.
Aamma atuaruk KNAPK: raajartassat avinnissaat pitsaasuuvoq
- Piumasarput tusaaneqassappat, pisassiissutit 50-50-imik, pisassiissutigineqassapput. Taamaalillutik tunisassiorfiit mikinerit aamma atatiinnarneqanissaat qulakkeerneqassaaq. Taakkumi pisassiissutit ikilineqarnerisigut akilisinnaajunnaaratarsinnaammata, KNAPK-mi pisortaq Petrus Biilmann oqarpoq.