VIDEO Raajartassiissutit ikilineqarneri raajarniat ilaasa akiliisinnaajunnaarnerannik kinguneqarsinnaasoq
Kalaallit Nunaata imartaani raajat ikiliartorput, taamaammat ukiormannut raajartassiissutit 14 %-inik, tassalu 85.000 tonsinit 73.000 tonsinut ikilisinneqarput. Naalakkersuisullu taamatut aalajangernerat sinerissap qanittuani raajarnianut navianartorsiortitsissaaq:
- Annertoorujussuarmik navianartorsiortitsissaaq aaqqiisoqanngippat, Petrus Biilmann, KNAPK-mi pisortaq KNR-imut taama oqarpoq.
Sinerissap qanittuani raajarniat pisassakittuarnertik pissutigalugu aalisarsinnaaneq-ajorput
- Ukioq kingulleq ima pisassakereertigisimapput, allaat oktobari qiteqqutiinnartoq ilaat suliassaarullutik uniinnartariaqarlutik inuttatillu niutiinnartariaqarlugit, Petrus Biilmann, KNAPK-mi pisortaq taama oqarpoq.
- Ukioq manna aaqqiisoqanngippat, taamatut milleriarneri pissutigalugit, naatsorsuutigisinnaavarput septembari aallartilaaginnartorlu, ilaat suliffissaarullutik.
- Maannakkummi raajarniutit taakku raajarniarsinnaatitaapput, saniatigut pisassanik allanik agguaaffigineqaneq-ajoramik, Petrus Biilmann, KNAPK-mi pisortaq KNR-imut taama oqarpoq.
Ilaqutariit eqqorneqassapput
- Qaammatini siullerni qulingiluani immaqa ajunngitsumik ingerlasinnaagaluarput, kisianni naatsorsuutigigutsigu ilaat aggustimi unissappata, taava ajoraluartumik qaammatit sisamat kingulliit toqqortaqarsinnaajunnaassapput.
- Taamaattumillu aamma inuttaqarniarnermikkut niutitsisariaqalernerannik kingunerisussaagamiuk aamma ilaqutariinnut sunniuteqartussaassaaq.