KNAPK: raajartassat avinnissaat pitsaasuuvoq
Illuatungaaniilli GA-p aalisartut piniartullu kattuffiat qineqqusaarneq iluatsillugu isumaliutigilluangaanngittunik aningaasaqarnikkullu akisussaassuseqanngitsunik piumasaqaateqarnerpaa. KNAPK-lli raajartarsiissutit avinneqaqquai, pitsaasumilli anguniagaqarnerarlutik.
- Taanna tunngaveqarpoq, ilisimatuussutsikkut illersorneqarsinnaammat, Aalisartut piniartullu kattuffiani KNAPK-mi siulittaasoq Henrik Sandgreen KNR-mut taama oqarpoq.
Aamma atuaruk KNAPK: Raajartassat avinneqarunik pitsaanerussaaq
Taassuma pisassiissutit allanngortinnianngilai, suliffissuillu pisassaat 57 procentiusariaqannginnerarpai. KNAPK-p ilaasortaalu avinneqaqqullugit.
Aalisarnerup iluani aaqqissuusseqqinnerup kinguneraa aalisartut raajartassat suliffissuarnut tunioraanerat. Tamannalu allanngortittariaqartoq Henrik Sandgreen isumaqarpoq. Oqaatigaalu raajarniarpassuit aalisarsinnaanngitsut raajartassatik tuninikuummatigit.
Aalisarnerup iluani misissuisoqarnerata takutippaa suliffissuaqarnikkut aningaasarsiornikkut pitsaanerpaamik iluanaarutaassasoq, GA-li isumaqarpoq, KNAPK-p pisassat avinniarneritigut inuiaqatigiinnut iluaqutaassanersut uppernarsaatinik amigaateqartoq.
Maannakkulli aaqqissuussineq malillugu sinerissap qanittuani aalisartut raajartassat 43 procentii pigivaat.
Henrik Sandgreenilu isumaqarpoq, pisassat Royal Greenlandimiinnatik polar Seafoodimiinnatik ilaasortaminut iluaqutaanerussasut.
- Taannana ineriartorneq ajortoq mumisinniaripput, illuatungaanut saatillugu. Tassa imaattariaqarami tamarmik inissaqartariaqarput. Aamma pisassaqarpoq peqarlunilu, taamaallaalliuna suliffissuaatilinnit marlunnit aqunneqarnerat anigortariaqaleripput, Henrik Sandgreen oqarpoq.
Ullumikkut pissutsit assiginagit aalisartut iluanaarnerussammata aalisarneq aaqqissuunneqaqqinnissaa KNAPK-p kissaatigaa.
KNAPK-lu GA-mut suliffissuaatilinnik sullissisumut unammillerpoq:
- Raajarniarnermi annaasagut taama annertutigitillugit soqutigisagut illersorniarpagut, nukigullu tamaasa atorniarpagut unammillerusukkatsigu aamma GA, Aalisartut piniartullu kattuffiani KNAPK-mi siulittaasoq, Henrik Sandgreen KNR-mut taama oqarpoq.
