Nunatta Parisimi isumaqatigiissummut ilanngunnissaanut apeqqut ukiamut kinguartinneqartoq
Nunarput Parisimi isumaqatigiissummut ilanngutissanersoq Inatsisartuni aalajangernissaq kinguartinneqaqqippoq.
Aalajangiineq ukiakkut ataatsimiinnissamut maanna kingunartinneqarpoq.
Nunatta ilanngussinnaaneranik aalajangiinissaq aatsaat siullerpaamik kinguartinneqanngilaq. Siunnersuut maajip 19-iani siullermeerneqarmat Inatsisartuni aamma isumaqatigiittoqanngilaq.
Naalakkersuisut siulittaasuata, Múte B. Egede Nunatta Parisimi isumaqatigiissummut ilanngunnissaa 2021-mi oqaatigaa. Tamanna Skotlandimi ataatsimeersuarnermi Cop26-mi oqaatigaa.
Aalajangiinerli Inatsisartuni akuerineqanngilaq, tamannalu pissutigalugu nunatta ilanngunnissaa Múte B. Egedep neriorsuutigereeraluaraa suli piviusunngunngilaq.
Siumup aalajangiiffigiuminaatsikkaa
Pingaartumik Siumup nunarput nunarsuarmi mingutsitsinnginnerulernissamut ilanngutissanersoq aalajangiiffiugiuminaatsippaa, suli isummerani.
Silaannaammi pissusia pissusia ilisimanngisarpassuusut, partiip siulittaasuata, Erik Jensenip KNR-imut oqaatigaa.
- Sunaluunniit isumaqatigiissut pingaaruteqarsinnaasarpoq ilannguffigissallugu, sunik qanorli kinguneqarsinnaasorli aamma paasisimassallugu pingaaruteqartuuvoq.
Aningaasaqarnikkullu soorunami aamma kinguneqassaaq.
Kingunerusussat misissorneqassasut
Silaannaap maanna allanngoriartornera iliuuseqarfigineqanngippat, qularutigineqassanngilaq nunarput eqqugaanerpaasussanut ilaassammat. Taamaammat nunatta iliuuseqaqataanissaa aamma aalajangiisuulluinnassaaq.
Iliuuseqarnissarli imaaliinnagassaanngitsoq, Erik Jensen isumaqarpoq.
- Inuiaqatigiinnut nunatsinnullu kingunissaanik qulaajaalluarsimanissamik piumasaqarpugut, qanoq sunniuteqassava nunatsinni attaveqaqatigiinnikkut innuttaasunut aningaasatigut illoqarfiinni nunaqarfinnullu, taanna oqarpoq.
Neriorsuuteqarusunngitsoq
Naalli ukiamut siusinnerpaamik aalajangiisoqassagaluartoq partiip nunatta Parisimi isumaqatigiissummut ilanngunnissaanut tapersiinersoq akerliunersorluunniit pillugit apeqquterpassuit suli akineqaqqaartussaapput.
Taamaammat Erik Jensenip ukiamut isumaqatigiissusiortoqassanersoq aamma neriorsuutigerusunngilaa.
- Tassa taanna ataatsimiititaliap sulinermini taamatut inississasoq isumaliutigissutigissagaalu aatsaallu kingusinnerusukkut upernaakkut ataatsimiinnerup kingorna suliat inernilerneqassasut aalajangerpoq. Taamaammat isaasalerlugu tupaallannartoqanngilaq, qulaajagassat suliassallu annertuppata. Soorunami piffissaq pisariaqartinneqartoq ataatsimiititaliap sulinermini pisariaqartippagu soorunami aamma taanna periarfissaavoq, siulittaasoq oqarpoq.