Nunatta ammaqqinnissaa ataasinngorpat saqqummiunneqassasoq
Timmisartukkut angallannermut killilersuinerit, maanna atuuttut maajip ulluisa 31-anni qaangiuttussaapput. Ullormut tassunga ullut qulingiluaannanngorput.
Politikerilli Inatsisartuni pingasunngornermi ataatsimiinnerminni akunnerit tallimat minutsillu 15-it ammaaqqinnissamut periusissiamik oqallisiginnikkamik qanoq pisoqarnissaa aalajangiiffiginngilaat.
Ammaasoqarnissamut periusissaq:
Immikkoortoq 1: Danmarkimi tunillatsittunik misissuinermi tunillatsissimasut 5 % qaangersimanngippassuk ammananissaq aallartinneqarsinnaassaaq.
Sapaatip akunneranut timmisartumut ilaallutik tikittut amerlanerpaamik 600-sarnissaat ammaanissap kingunerissavaa.
Angalasut misissortinnermi tunillatsissimassanngillat, tikinnerullu kingornagut ullut tallimat qaangiunnerisigut misissortittassallutik. Angalasut tikereernermik kingorna tunillatsissimannginnermut misissorneqarnissartik tikillugu mattusimatinneqassapput.
Tamatuma saniatigut massakkut peqqusinerit innersuussutillu aalajangiusimaannarneqassapput.
Ullorli maanna qanilliartorunarpoq. Partiimmi siulittaasui tamarmik Kim Kielsenimut ullumi siusinnerusukkut ataatsimiigiaqquneqarput, taakkulu ”ammaaqqikkiartornissamut Immikkoortoq siulleq” ataasinngorpat saqqummiunniarpaat.
Naalakkersuisut tusagassiiviata tamanna nalunaarutigaa.
AAMMA ATUARUK Akunnialuit oqallinnerup kingorna: Politikerit nunatta ammaqqinnissaanut suli ulluliisinnaanngitsut
Naalakkersuisut siulittaasuata, Kim Kielsenip partiit siulittaasui tallimanngornermi ataatsimiigiaqquniarlugit Inatsisartuni pingasunngornermi ualikkut kingusissukkut oqallittoqareernerani oqaatigaa.
- Partiit siulittaasui tallimanngorpat ataatsimiigiaqquniarpakka ammaaqqikiartornissarlu oqallisigalugu, Kim Kielsen oqarpoq.
Ammaaqqikkiartornissamullu periusissiaq ataasinngornermi ullaakkut qulingiluanut saqqummersinneqassasoq tallimanngornermi ualikkut nalunaarutigineqarpoq.
Saqqummiineq KNR-ikkut knr.gl-ikkullu toqqaannartumik aallakaatinneqassaaq.
Nunamut isernissamut akuersissuteqarneq
KNR-ip Kim Kielsen Naalakkersuisullu sinneri nunatta ammaqqinnissaanut ullumik ullumikkut qanoq piareersimatiginersut paasiniarlugu oqaaseqartinniaraluarpaa - Kim Kielsenili ataatsimiinnera pissutigalugu tamanna iluatsissimanngilaq.
Nunatsinnit aallarnissaq maanna periarfissaavoq, nunatsinnullu isernissaq maajip ulluisa 31-annut suli inerteqqutaalluni.
Taamaammat nunatsinnut uterlutik angalaniartut nunatsinnut iseqqinnissamut oqartussanut attaveqaqqaarlutillu akuersissuteqarfigineqaqqaassapput.
AAMMA ATUARUK Ammaassiartoqqinneq sukkasuumik pisinnaasoq, politikerit isummerput
Juunip ulluisa aallaqqaataannit Air Greenland annertusiamik upalungaarsimanermik taaneqartumik pilersaarusiaqarpoq. Isumaqatigiissut taanna Namminersorlutik Oqartussat Air Greenlandimut isumaqatigiissutigaat, taannalu naapertorlugu juunip ulluisa aallaqqaataannit Kangerlussuup Københavnillu akornanni sapaatip-akunneranut pingasoriarluni timmisartuussisoqartassaaq. Air Greenland nalinginnaasumik sapaatip-akunneranut quleriarluni timmisartuussisaraluarpoq.
Taamaammat juunip ulluisa aallaqqaataat pisortatigoortumik ammaasoqarnissaanut ullussatut aalajangerneqanngilaq – ullorli taanna Air Greenlandimi upalungaarsimasoqarnerup sivitsorneqarnerata atuutilerneranut ulluuinnarluni.
Nunarput immikkoortunik pingasunik ammariartuaassasoq Kim Kielsenip siusinnerusukkut oqaatigaa. Tamanna uani atuarsinnaavat.