Nunatsinnut utertut qinersisinnaanermut qinnuteqassasut
![Qinersineq](/sites/default/files/styles/image_934x467/public/article_images/inatsisartunut_qinersineq_2009.jpg?itok=vaoei4T2)
Immikkut ittumik qinnuteqarnissaq kisimi piumasaqaataavoq. Qinnuteqaatissaq uani aaguk.
Namminersorlutik Oqartussat tamanna erseqqissaatigaat, ilinniagaqartut nunatsinnut uternerminni qinersisinnaatitaannginnerannik Radioaviisimit oqaluttuarineqarnerata kingorna.
Namminersorlutik Oqartussat tusagassiuutinut nalunaaruteqarlutik erseqqissaatigaat, Kalaallit Nunaata avataani ilinniartut aapparisaasa inooqataasalu Inatsisartunut qinersinermut qinersisinnaatitaanertik pigiinnarsinnaagaat.
Qinersisinnaatitaaneq aamma atuuppoq Kalaallit Nunaata avataani peqqinnissamut pissutsit pissutigalugit imaluunniit kalaaliullutit folketingimut ilaasortaaguit imaluunniit nunani allani Namminersorlutik Oqartussanut sinniisuuguit.
Naatsumik oqaatigalugu, Kalaallit Nunaata avataaniinneq utaqqiisaagallassaaq, piffissamilu imminut ataannartumi sivikinnerpaamik ukiuni marlunni Kalaallit Nunaanni najugaqareersimasuunissaq.
Namminersorlutik Oqartussat ilanngullugu erseqqissaatigaat, qinersisinnaatitaaneq pigiinnarumallugu qinersisinnaanermut qinnuteqarnissaq.
Qinnuteqarneq akuerineqarpat qinersisussat allattorsimaffiannut ukiuni marlunni atuuttussami ilanngunneqartarput, sivisunerusumillu Kalaallit Nunaata avataaniissagaanni qinnuteqaat nutarterneqartariaqarpoq.
Ilinniagaqartut ilinniarnerminnik naammassinnillutik nunatsinnut utertut, innuttaasut allat assigalugit kommunimit allamut nuunnermi qinersisussat allattorsimaffiannut allatsissimanissap qulakkeerneqarnissaa isumagineqartussaavoq.
Nunatsinnut angerlartoq sunneeqataasinnaasoq
Maliina Louise Lyberth inatsisileruutut ilinniarnerminik naammassinneqqammersoq ippassigami KNR-imut oqaluttuarpoq Inatsisartunut qinersisoqarnerani qinersisinnaatitaanerluni paasiniarlugu kommunemut saaffiginnilluni. Maliina Louise Lyberth KNR-imut nalunaarpoq inatsisartunut qinersinissamut qinersisinnaatitaalluni, inatsisartunut qinersinermi qinersisinnaanissamut qinnuteqaataa piumasaqaatinut naapertuummat.