Nunatsinni tarnikkut nakuuserneq Justitsministerimit pinerlunninngortinniarneqartoq
Aapparisaq angajoqqaarluunniit naleqannginnerarlutit asanninnermilluunniit tunineqartussaanngitsutut uteqqialluni oqaqattaartoq.
Tamanna inerteqqutaalersinnaavoq.
Danmarkimi justitsministeri Peter Hummelgaard (Socialdemokratiet) taama aalajangerpoq Folketingimi inatsisissatut siunnersuummik saqqummiussinermigut.
Taama Justitsministeria tusagassiorfinnut allagaqarpoq.
- Tarnikkut nakuuserneq pillugu inatsisissatut siunnersuummutt Naalakkersuisut kissataat tunngavigineqarpoq – minnerunngitsumillu tarnikkut nakuusernerup pinerlineqartumut annertuumik sivisuumillu sunniuteqarsinnaammata.
- Kalaallit Nunaanni tarnikkut nakuusernerup pinerlunninngortileratsigu taamaammat pitsaasuuvoq, taamaalillutalu pinerluttulerinermi inatsit aqqutigalugu ersarissumik oqariartuuteqarluta tarnikkut timikkullu nakuusernerit naligiittut, Peter Hummelgaard tusagassiorfinnut nalunaarummi oqarpoq.
Inatsisartuni tarnikkut nakuusernerup qanigisani nakuusernermut nallersuunneqarnissaa pillugu inatsisissatut siunnersuut maajip aallartinnerani akuersissutigineqarpoq.
Inatsiseqarnermik suliassaqarfik Danmarkip naalagaaffianit akisussaaffigineqarpoq, taamaammallu inatsisit Folketingimi inaarutaasumik akuerineqartussaalluni.
Inatsisissatut siunnersuummi inuk arlaleriarluni sakkortuumik nikanarsarsimagaanni imaluunniit innarliisumik pissusilersorfigigaanni, ilaatigut inooqataanikkut killup tungaanut aqutsisimagaanni pillaatisisoqarsinnaavoq.
Qanigisaasut tassaapput najugaqatigiissimagaanni imaluunniit imminnut qanittumik attaveqaraanni. Tassaasinnaavoq aapparisamut imaluunniit ilaqutarisamut.
Nuna tamakkerlugu immikkut ittumik pinerluutinut immikkoortortaq
Ilutigitillugu Peter Hummelgaard inatsisissatut aamma siunnersuuteqarpoq, NSK-mik Kalaallit Nunaanni atuussinnaalersitsisussamik.
NSK tassaavoq National Enhed for Særlig Kriminalitet, nuna tamakkerlugu immikkut ittumik pinerluutinut immikkoortortamik taaneqarsinnaasoq. Immikkoortortaq Danmarkimi 2021-mi pilersinneqarpoq, tassani politiini unnerluussisussaatitaasunilu politiitut unnerluussisutullu piginnaasat immikkuullarilluinnartut ataatsimi katersorneqarsimallutik.
- Tamassuma saniatigut NSK Kalaallit Nunaanni suliani piginnaasaqalissaaq, NSK-milu piginnaasat immikkuullarilluinnartut Kalaallit Nunaanni pinerluttulerinermik suliani aamma atorneqarsinnaanissaasa qulakkeernissaa matumani qitiulluinnarluni, justitsministeri oqarpoq.
Inatsisissatut siunnersuut taakku marluk Naalakkersuisunut saqqummiunneqarsimapput taperserneqartumik.
Folketingimi akuersisoqassappat inatsisissatut siunnersuutit 1. januaarimi aamma 1. marsimi 20024-mi atulersinneqarsinnaassapput.
Tarnikkut nakuuserneq Danmarkimi 2019-imi inerteqqutaalersinneqarpoq.
