Inatsisartut tarnikkut nakuuserfigineqarneq inatsisinik unioqqutitsinerulersinniaraat

Tarnikkut nakuuserneq timikkut nakuusernermut naleqqiunneqarnissaannut inatsisissatut siunnersuut Inatsisartuni ullumi siullermeerneqarpoq.

Tassa inummut qanittumik attuumassuteqartumut arlaleriarluni sakkortuumik nikassaaneq imaluunniit kanngunarsaasumik pissusilersuuteqarneq ilaatigut killilersuineq pillugit pillaatissiisoqarsinnaalissalluni.

Qanittumik attuumassuteqarneq tassaavoq najugaqatigisimasaq imaluunniit qanittumut attaveqarfigisaq. Taanna assersuutigalugu aapparisaasinnaavoq imaluunniit ilaqutaasinnaavoq.

Inatsisartuni partiit tamarmik siunnersuut taperserpaat Inatsisartunilu aappassaaneerneqannginnerani inatsisinut ataatsimiititaliamut nassiunneqarpoq.

- Tarnikkut nakuuserfigineqarneq inuup kiffaanngissusaanut tarnikkullu peqqissusaanut kingunerluuteqangaatsiarsinnaavoq. Tarnikkut nakuusernerup sunniutai sivisuumik kingunerluutigineqarsinnaapput, aatsitassanut inatsiseqarnermullu naalakkersuisoq, Aqqaluaq B. Egede inatsisissatut siunnersuuteqarnermini oqarpoq.

Innuttaasut paasissutissiiffigineqassasut

Partiit arlallit inatsit akuerineqassappat paasissutissiinermik qaammarsaasoqarnissaa pingaaruteqartoq, Inatsisartuni oqallinnermi arlaleriarlutik erseqqissaassutigaat.

- Siunnersuutip atuutilernissaanut innuttaasunut paasissutissiinermik qaammarsaasoqarnissaa pisariaqartoq isumaqarpugut. Innuttaasut pisinnaatitaaffimminnut nutaanut ilisimanninnissaat pingaaruteqarpoq, Inuit Ataqatigiinnit, Asii Chemnitz Narup oqarpoq.

Naleraq isumassarsiamut aamma tapersiivoq.

- Paasissutissiinermik qaammarsaasoqarnissaa pingaaruteqarpoq. Inatsisissatut siunnersuutip qanoq imaqarnera pillugu innuttaasut ilisimanninnissaat pingaaruteqarpoq, Naleqqap siulittaasua, Pele Broberg oqarpoq.

Naalakkersuisup, Aqqaluaq B. Egedep siunnersuuteqartuusup qaammarsaasoqarnissaanut aningaasassarsinissaq pisariaqartoq erseqqissaatigaa.

- Paasissutissiinermik qaammarsaanissamut atatillugu ataatsimiititaliap inatsisissatut siunnersuut atuutilersinneqareersoq danskit naalakkersuisuinit qaammarsaanissamut aningaasassaqareersoq paasineqarsinnaasoq misissussavaa.

Inatsiseqarnermut oqartussaaffik danskit naalakkersuisuisa ataanniippoq, taamaammat inatsit Folketingimi akuerineqaqqaassaaq. Tarnikkut nakuuserneq Danmarkimi 2019-imi inatsisitigut unioqqutitsinerulerpoq.

Siunnersuut Inatsisartuni maajip 23-ani aappassaaneerneqassaaq.