IA, Naleraq Atassullu: Timikkut tarnikkullu persuttaaneq akuersaanngilluinnarparput

Jens Napãtôp Naleqqameersup Inatsisartunit sulinngiffeqarnissaminik kissaateqarluni qinnuteqaataa inatsisartut siulittaasoqarfianit ippassaq tiguneqarpoq, kiisalu Siumup aamma Demokraatit inatsisartuni ilaasortaatitaasa inatsisartut ataatsimiittarfiannit aninerannut atatillugu, partiit sinnerisa persuttaasarnerup akuerineqarsinnaannginnera tusagassagassiuutinut nalunaarutigaat.

Partiit pingasut, Inuit Ataqatigiit, Naleqqap Atassutillu siulittasui ataatsimoorlutik nalunaaruteqarlutik ima allapput:

- 'Partiini siulittaasut ataani atsiortugut naqissuserlarput timikkut tarnikkullu -persuttaaneq akuersaanngilluinnaratsigu, taamatuttaarlu meeqqap illersugaanera sutigut tamatigut salliutikkatsigu, partiit pingasut siulittaasui taama allapput, nangillutillu:
 
- Uniorlugillu pisoqarsimappat iliuutsit tamakku kinguneqartinneqartassammata, Múte Bourup Egede, Hans Enoksen aamma Aqqalu Jerimiassen ataatsimoorlutik nalunaaruteqarlutik taama allapput.

Inunnut ataasiakkaanut tunngasut ammasumik ataatsimiinnermi oqaluuserineqassanngitsut

Partiit siulittaasui ataatsimoorlutik oqaaseqaateqarnerminni inatsisartuni ippassaq pisoq pillugu ima allapput:

- Inatsisartuni marlunngornermi ataatsimiinnermi pisoq tamatsinnut tujorminarpoq, erseqqissarlarpulli Inatsisartuni inunnut ataasiakkaanut tunngassutilinnik ammasumik oqaluuserisaqarnissaanut pisinnaatinneqannginnatta,

AAMMA ATUARUK Jens Napãtôk Inatsisartunit sulinngiffeqarumasoq

- Ilisimaaraarput iliuutsit inuiaqatigiinnut sunniuteqartarmata, Inatsisartullu inuiaqatigiinni maligassiuisussaammata, partiit siulittasui taama allapput.

Partiit siulittaasui oqaaseqaateqarlutik allapput, ulluni kingullerni inoqatinut attaveqaatitigut tusakkat takusallu tunngavigalugit inuit aalassassimaartut, Inatsisartunittaaq pisoq tamanit aamma aalassassimaarutigineqartoq.

Politikereq Naleqqameersoq KNR-imut oqarpoq, arnaatiminut persuttaasimanani, taamatuttaaq arnaataa KNR-imut aamma taama nassuiaateqarluni.

Partiit ataatsimiittarfimmit aniasut

Jens Napãtôq Inatsisartut aningaasaqarnermut akileraartarnermullu ataatsimiititaliaani siulittaasutut marlunngornermi toqqarneqarmat tamanna akerleralugu Siumut aamma Demokraatit inatsisartut ataatsimiittarfiannit aniapput.

Inuit Ataqatigiit, Naleraq aamma Atasssutip nalunaarutaanni, partiit siulittaasui allapput, kukkusumik qisuariarnerusoq.

- Partiini siuttuusugut kissaatigaarput suliaq inunnut ataasiakkaanut tunngasoq torersumik ingerlanneqassasoq. Uagut Inatsisartuni inatsisit malillugit sulineq, aamma ilungersunartunik pisoqarsimatillugu, inatsisit malillugit sulinerup ataavartumik ingerlanneqarnissaa qulakkeerinneqataaffigissavarput. Inuit Ataqatigiit siulittaasuat Mute Bourup Egede, Naleqqap siulittaasua Hans Enoksen aamma Atassutip siulittaasua Aqqalu Jeremiassen tusgassiuutinut nalunaruteqarlutik taama allaput.

AAMMA ATUARUK Hans Enoksen: Jens Napaattuup ilaqutai ajunnginnerpaamik kissaappagut

Jens Napãtôp sulinngiffeqarnissamut qinnuteqaataa inatsisartuni sulinermit Avannaatalu Kommuniani kommunalbestyrelsimi sulinermit atuuppoq.