Hans Enoksen: Jens Napaattuup ilaqutai ajunnginnerpaamik kissaappagut

Ulloq Naleqqameersumut, Jens Napaattuumut pisoqarfiungaatsiarpoq.

Taanna Inatsisartuni aningaasaqarnermut akileraartarnermullu ataatsimiititaliamut siulittaasutut ullaap tungaa toqqagaavoq – taannali ataatsimiittarfimmi najuutinngilaq, akunnialuillu qaangiuttut taanna sulinngiffeqarnissaminik qinnuteqarpoq.

- Eqqaamassavarput ikioqquneq aamma nukiummat – tamannalu ataqqillugu ilaqutariittut ingerlariaqqinnissaat ajunnginnerpaamik kissaallugit sulinngiffeqarnissaanut qinnuteqaat taperserparput, partiip siulittaasua, Hans Enoksen oqarpoq.

AAMMA ATUARUK Jens Napãtôk Inatsisartunit sulinngiffeqarumasoq

Jens Napaattuup sulinngiffeqarnissaminik qinnuteqarnerani video Facebookikkut siammarterneqartoq pissutaavoq. Videoliami inuit pingasut inimiittut takutinneqarpoq. Taakkunannga marluk tassaapput Jens Napaattooq taassumalu inooqataa. Napaattuup inooqataa natermi nalavoq, Napaattuullu sequtserniarlugu siorasaarpaa.

Ilaqutariittut katsorsartissasut

Ilaqutariinnilu ajornartorsiuteqarneq Jens Napaattuup Inatsisartunit sulinngiffeqarnissamik maanna qinnuteqarneranut aamma pissutaavoq.

- Aappannguara tapersersorumallugu ilaqutariittullu suliassagut meerannguagullu tamattaalluta aqqusaagaqarnikooqigatta, maannalu puttallartup kinguneranik kiisami katsorsartinnissarput meerannguagullu angusussanngoratsigu ilaqutariittut oqiliallaatigeqaara, Naleqqamit politikeri oqarpoq.

Taassuma aapparminut nakuusersimanani KNR-imut oqaatigaa – taassumalu aappaata allakkatigut aamma taperserpaa.

AAMMA ATUARUK Siumukkormiut Inatsisartut ataatsimiittarfiannit aneriasaartut

Jens Napaattuup oqarnera naapertorlugu maanna ilaqutariittut katsorsartinneq aallartissavaat, partiiani siulittaasup tamatumanik taperserpaa:

- Inatsisit atuuttut ataanni ingerlatsineq paquminaraluarsinnaasoq inuit ikiortariallit, kinannguugaluartut kinarsuugaluartut ikiorserneqarnissaat ataqqillugu Naleqqamiit qinnuteqaat tiguarput.

Jens Napaattoq Aningaasaqarnermut Akileraartarnermullu ataatsimiiititaliamut siulittaasutut toqqagaavoq. Taassuma sulinngiffeqarnerani kiap taarsissavaa?

-  Tassa taanna Inatsisartut ataatsimiititaliaata nammineq isumagisussaavaa, tassa suliassaat. Ataatsimiititaliat uanga akuleruffigisinnaanngilakka, Hans Enoksen oqarpoq.

Jens Napaattooq Avannaata Kommunianut kommunalbestyrelsimut aamma qinigaanikuuvoq. Tassanilu aamma sulinngiffeqarnissaminik qinnuteqarpoq.

Jens Napaattooq Inatsisartunut qinersinermi 324-nit taaguunneqarpoq. Avannaata Kommunianilu kommunalbestyrelsimut 213-nit aamma taaguunneqarluni.