Siumukkormiut Inatsisartut ataatsimiittarfiannit aneriasaartut

Uissuumminartumik Inatsisartut ataatsimiittarfianni pisoqarpoq.

Tassami Siumukkormiut Demokraatillu ataatsimiittarfimmit anipput.

Hans Enoksenimmi Inatsisartut Aningaasaqarnermut Akileraartarnermullu Ataatsimiititaliaanni ilaasortanngortussatut piukkussat aqqi taagoriitsiareeralu, Siumukkormiut Demokraatillu Inatsisartut ataatsimiittarfiannit anipput.

Siumup siulittaasuata tullersortaa ataatsimiittarfimmi oqaaseqarpoq, oqarlunilu:

- Naalakkersuisoqatigiilersut oqaatsit kusanartorujussuit aallaavigalugit naalakkersuisoqatigiinneq isumaqatigiissuseq suliarisimavaat. Tassani pingaanertut meeqqat ukkatarineqarnissaat aamma naqissusigaalluni. Oqaatsit kusanartorsuit anninneqarput.

- Maanilu inimi isersimanitsinni qamuuna anniaatigalugu anngukkusutara tassaavoq uagut sakkortusisamik maani inatsisartutut pisussaaffeqarpugut inoqatigut pitsaanngitsumik pineqarpata iliuuseqartussaalluta, suli inoqatitsinninngaanniit sakkortunerusumik.

- Taamaammat pisut kingulliit aallaavigalugit sakkortuumik oqaatigerusutarput unaavoq, akuerisinnaannginnatsigut meeqqat qalliutinneqarlutik inissisimatinneqarneranni meeqqat illersorneqartariaqarneranni pisut isiginngitsuusaaginnassanngisagut pisimasut taakkua qarsutiinnarlugit ingerlasinnaannginnatta.

Ataatsimiinneq unitsinneqartoq

KNR-ip Siumukkormiut Demokraatillu oqaaseqartinniarsarileruttorpai.

Siumup siulittaasuata tullia, Vivian Motzfeldt, imatuinnaq oqarpoq:

- Siumut nakuusernermut, ikiaroornartumut meeqqanillu ilungersunartorsiortitsinermut akuersaanngilluinnarpoq. Inoqatinut attaveqaatini pisut kikkulluunniit ilisimaaraat – taamaammat tamanna pillugu annertunerusumik oqaaseqarusunngilanga, taanna KNR-imut oqarpoq.

Vivian Motzfeldtip sorpiaat eqqartornerai, KNR-ip misissuleruttorpaa. 

Inatsisartut ataatsimiititaliaanni arlaliusuni, tassa Aningaasaqarnermut Akileraartarnermullu Ataatsimiititaliaanni, Nunanut Allanut Sillimaniarnermullu Ataatsimiititaliaanni taavalu Inatsisinut Ataatsimiititaliaanni, ilaasortassanngortussanik ullumi marlunngornermi ataatsimiinnerminni toqqaassapput.

Ataatsimiinneq unitsinneqarpoq.

Hans Enoksenili Vivian Vivian Motzfeldtimut ataatsimiinnerup unitsinneqannginnerani ima oqarpoq:

- Tassa uani oqaluuserisassat immikkoortoq 10 eqqartorpartut, aamma inunnik tunngasunik maani pisinnaatitaanngilagut naajuutinngittunut allanullu eqqartuinissatsinnut.

Ataatsimiittarfimmit anisut

Siumup siulittaasua, Erik Jensen, aamma oqaaseqarumammat, Hans Enoksen ima oqarpoq:

- Erik Jensen, tassunga tunngassappat unitsissavassi.

Erik Jensenili nangippoq.

- Inuttut assigiinngitsunik naleqartitaqarpugut, taamaattumillu inatsisartut ataqqinartoq siulittaasuat kaammattuutigissuara ataatsimiinneq unillatsiartinneqassasoq eqqartoqqinneqassasorlu.

Hans Enoksen ima akivoq:

- Qinnuigissavakkit pissuserissaarlusi inuit najuutinngitsut maani eqqartorneqassanngimmata. Tassunga unitsippara oqaaseqarsinnaanerit.

- Inummik taasaqanngikkaluarpunga. Ataatsimiinneq unikaallatsittariaqarpoq, Erik Jensen oqarpoq.

Hans Enoksen:

- Ataatsimiinneq aqunneqarpoq, ilisimatereerpakkit. Eqqissillutit. Pissuserissaarlusi maani ataatsimiinnermi peqataassaasi, tassa qulakkiigassarput tamatta. Ataqqinassuseq inuit peqataanngittut tusaatinnagit nikanarsaatinnik allanillu oqaluttoqarsinnaanngilaq.

Kim Kielsen (Siumut) aamma oqaaseqarumavoq:

- Siulittaasoq Erik Jensen Siumumeersoq kissaatigivaa ataatsimiinneq unikaallatsinneqassasoq. Unikaallatsinneqarnissaa taanna kaammattuutigissavara ilalerneqassasoq.

Hans Enoksen akivoq:

- Tassa ataatsimiitsitaliat maani naammassineqassapput, unikaallattoqassappat ataatsimiinermi allami naammassisinnaavarput.

Taava Siumukkormiut Demokraatillu ataatsimiittarfimmit tamatuma kingorna anipput.