Nunatsinni politiit Peqatigiiffiat: Anguniagarput suli angunngilarput
Nunatsinni Politiit Peqatigiiffianni nuannaarneq killeqarpoq.
Naalakkersuinikkut isumaqatigiissuteqartoqaraluartoq, politiillu nunatsinniittut aningsarsiaasa 10,8 millionit koruuninik aningaasaliisoqaraluartoq, danskisulli aningaasarsiaqalernissaq anguneqaqqajanngilaq.
- Nuannaarutissaavoq. Kisianni aamma eqqaalaassavara, taamatut assigiimmik akissaateqalernissap tungaatigut alloriarnerup ilaminiinnaaraa, Nunatsinni Politiit Peqatigiiffianneersoq, Jesper Fleischer oqarpoq.
Nalimmassaanermi tapit tunngaviusumik akissarsianut naleqqussarneqartut
Isumaqatigiissummut ilaasutut 2,5 millionit koruuninik politiit tapiinut illuartinneqarput. Taakkulu kalaallit danskillu tunngaviusumik akissarsiaasa nikingassutaannut naleqqussaataassaapput. Jesper Fleischerillli oqarnera naapertorlugu tapi kalaallit qallunaallu akissarsiaatsa assigiingissutaanni arlalinni ataasiinnaavoq.
- Tassa imatut paasisariaqarpoq tunngaviusumik akisarsiagut assigiinnginnamik, taava uagut nalimmassaanermut tapeqaratta assigiinngissutaanik naligiilersitsisumik, taava taassuma ilaanut aamma naligiilersitsisussatut taakku tapiissutit ilaappu. Kisianni tunngaviusumik akissarsiani ilaanngillat. Tassa imaappoq utoqqalinersiutitaqanngillat.
AAMMA ATUARUK Politiit akissarsiaanut qaffaaneq: Ukiunut sisamanut 10,8 millionit koruunit
Folketingip aningaasat 49,2 millionit koruunit immikkortippai.
38,4 millionit koruunit pineqaatissinneqarsimasunut inissiisarfinni nakkutilliisut akissarsiaannut qaffaataassapput.
10,8 millionit koruunit politiit akissarsiaannut qaffaataassapput.
Aningaasanit 2,5 millionit koruunit politiini nakkutilliisut tapissaannut atorneqassapput. Aningaasat taakku nunatsinni politiit Københavnimilu politiit tunngaviusumik akissarsiaannut naligiissaarutaassapputJesper Fleischer taama oqarpoq, taassuma oqarnera naapertorlugu taamaaliornikkut Danmarkimi Savalimmiunillu akissarsiatigut nikingatitsisoqarnera suli allanngunngilaq.
Akissarsiat qaffannissaannut tunngatillugu Justitministeriaqarfik folketingimilu ilaasortat nunatsinneersut marluk isumaqatigiissuteqartuupput. Ministeriaqarfiup tusagassiutinut nalunaarutaa naapertorlugu nunatsinni politiinik atorfinitsitsisarneq sulisoqarnerlu patajaallisarniarlugit taamatut iliuuseqarput.
- Sulinermi atukkanik isumaqatigiissuteqalernissarput tamatsinnut assigiimmik, sumiikkaluarutta naalagaaffeqatigiinnerup aqqani assigiimmik, atugaqalernissarput suliniutigiuassavarput.
Assigiimmik akissarsiaqalernissaq sorsuutigissavarput
10,8 millionit koruunit taakku immikkoortitaapput, Folketingimit aningaasanut inatsisaani 2020-mi akuersissutigineqartumi 50 millionit koruniusunut ilaasut. Taakku nunatsinni politiit pineqaatissinneqarsimasunullu inissiisarfinni nakkutilliisut akissarsiaatigut pitsanngorsaanissamik qulakkeerutaasussapput.
Nunatsinni pinerluuteqarsimasunut inissiisarfinni nakkutilliisut, nunatsinni najugaqavissut, aningaasarsiaat ukiuni sisamani 38,4 millionit koruuninik apriilimi pitsanngorsarneqarput.
Jesper Fleischerip aningaasat amerlanersaasa inissiisarfinni nakkutilliisut aningaasarsiaasa pitsanngorsarnissaannut atorneqarniarnerat paasilluarsinnaavaa. Polit iit kalaallit 1980-ikkunni nalimmassaataasumik tapeqalersimasut, inissiisarfinnili nakkutilliisut taamatut pineqarsimanngitsut, taassuma eqqaavaa. 10, 8 millionit koruunit politiinut tuttussat pillugit ima oqarpoq:
AAMMA ATUARUK Nunatsinni Politiit Peqatigiiffiat: Akissarsiatta qaffannissaannut aningaasat sinneruttut ikippallaarput
- Siumut ingerlarusaarnerput taanna arriippoq kisianni annerusumik iliuuseqarusunnaraluarpoq, aamma qallunaat nunaanni naalagaaffik iliuuseqaqqunaraluaqaaq.
Nunatsinni Politiit Peqatigiiffiata kalaallit politiit Savalimmiuuni Danmarkimilu suleqatimik animgaasarsiaattut akningasarsdiaqalernissaat suli soulissutigissagaa, Jesper Fleischer oqarpoq.
