Nunatsinni politiit akissarsiaasa qaffannissaannut aningaasanit immikkoortitanit sinneruttut 10 millionit koruunit missaanniipput. Aningaasat sinneruttut pisariaqartitanit ikinnerungaatsiartut, Nunatsinni Politiit Peqatigiiffiata siulittaasua jesper Fleischer isumaqarpoq.Assi: Rigspolitiet

Nunatsinni Politiit Peqatigiiffiat: Akissarsiatta qaffannissaannut aningaasat sinneruttut ikippallaarput

Katillugit 38,4 millionit koruunit pinerluuteqarsimasunut inissiisarfinni nakuutilliisut akissarsiaannut qaffaataasussanngorput. Politiinulli 10,8 millionit koruuniullutik.

Nunatsinni pinerluuteqarsimasunut inissiisarfinni nakkutilliisut akissarsiaasa ukioq manna januaarip aallaqqaataaniit kingumoortumik atuutilersumik qaffanneqartussanngornerat pissusissamisoorluinnarpoq.

Nunatsinni Politiit Peqatigiiffiata siulittaasua Jesper Fleischer taama isumaqarpoq.

Danskit naalagaaffiata aningaasat immikkoortitaat 50 millionit koruunit missaanniittut amerlanerpaartaat nakkutilliisut akissarsiaannnut qaffaataasussanngormata taassuma paasisinnaavaa, naak Nunatsinni Poliit Peqatigiiffiata nunatsinni politiit Danmarkimi politiitulli akissarsiatigut atugaqartitaalernissaat tamaviaarutigigaa.

AAMMA ATUARUK 38,4 millioner kroner mere til anstaltbetjentes løn

Nunatsinnimi nakkutilliisut nunatsinni politiinut sanilliullutik Danmarkimi suleqatiminnit akissarsiakinnerunerat sivisunerusumik atuuppoq.

- Nakkutilliisut tunngaviatigut qutsappakka. Ilami uagutsitut nalimmassaanermut tapisisanngillat. Taamaattumik aningaasat immikkoortitat amerlanerpaartaat taakku akissarsiaannut qaffaataasussanngornerat pissusissamisoorsoraarput, Jesper Fleischer KNR-imut mailimi taama allappoq. 

10 millionit koruunit malunnaataangaarnavianngitsut

Katillugit 38,4 millionit koruunit nakkutilliisut akissarsiaannut ukiuni sisamani tulliuttuni qaffaataassapput. Taakkunannga sinneruttut 10,8 millionit koruuniusut amerlanerpaartaat tamaasaluunniit nunatsinni politiit akissarsiaannut qaffaataassasut, Nunatsinni Politiit Peqatigiiffiata naatsorsuutigaa.

Jesper Fleischerip nakkutilliisut taperseraluarlugit aningaasat suleqatiminut atorneqartussat amerlanerunngimmata uggoraa.

- Danmarkimi suleqativut assigalugit taakku akissarsiatigut atugaat uagutsinnut aamma atuutilernissaannut aningaasanit immikkoortitanit amerlanerusunik pissarsinissarput soorunami kissaatigigaluarparput. Aningaasanit immikkoortitanit sinneruttut nunatsinni politiit Danmarkimilu politiit akissarsiaannut nalimmassaataasussat naammaqqajanngillat, Jesper Fleischer allappoq.

AAMMA ATUARUK Fængselsforbund: Tiltrængt aftale for anstaltsbetjente

Isumaqatigiissut Danmarkimi politiinut atuuttoq nunatsinni politiinut aamma atuutilissasoq, Nunatsinni Politiit Peqatigiiffiata kissaatigaa.

Tamannali Naalakkersuisuisunit tulleriiaanit, nunatta Folketingimi ilaasortaatitaanit Danmarkimilu Politiit Kattuffianit tamaviaarutigineqaraluartoq suli piviusunngunngilaq.

IA-p Siumullu politiit akissarsiaasa qaffaatissaat assortuussutigigaat

Nunatsinni politiit akissarsiaat sutigut qaffassanersut, Christiansborgimi Siumup IA-llu aamma assortuussutigaat.

AAMMA ATUARUK Politikerit: Nunatsinni nakkutilliisut akissarsiaat qangalili qaffatassaagaluarput

Taamaattumik Inatsiseqarnermut Ministereqarfiup aningaasanit immikkoortitanit sinneruttut 10 millionit koruunit missaanniittut sumut atornissaat pillugu isumaqatigiissut suli inaarsanngilaa.

Politiilli peqatigiiffiata siulittaasuata Jesper Fleischerip oqarnera naapertorlugu aningaasat taakku akissarsiaannit allatigut ilanngaataannginnissaat taamaallaat pingaaruteqarpoq.

- Tapisiaalersussat politiit akissarsiaanni malunnaataanissaat allatigullu ilanngaataannginnissaat uagutsinnut pingaartuusimavoq, taannaa KNR-imut allappoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat