Nunatsinni ph.d.-nngorniat nunatta Danmarkillu oqaluttuarisaanerannik qulaajaanissami pingaaruteqartut

Nunatta Danmarkillu oqaluttuarisaanerannik qulaajaasoqassasoq, danskit naalakkersuisui Naalakkersuisullu ukioq manna siusinnerusukkut nalunaarutigaat.

Qulaajaanissami anguniakkat amerlapput. Sorsunnersuarmimi kingullermiit maannamut pissutsinik assigiinngitsorpassuarnik qulaajaasoqaannarani saammaateqatigiinnissaq qulaajaanissami anguniakkanut aamma ilaavoq.

AAMMA ATUARUK Nunatta Danmarkillu oqaluttuarisaaneranik qulaajaanissaq kinguartittoq

Nunarpulli qulaajaanermi siunniuteqarluassappat, nunatsinni ph.d-nngorniat amerlanerusariaqarput. Ilisimatusarfiup Kulturimik, Oqaatsinik Oqaluttuarisaanermillu Immikkoortuata pisortaa, Inge Høst Seiding, taama oqarpoq.

 

Inge Høst Seiding.

- Taakkorpiaammi pillugit nunatsinni ilisimatusartuusugut amerlavallaanngilagut. Suliamik taama angitigisumik aallartinissarnermi nunatsinni ilisimatusartunik qulaajaaqataasussarsiornissaq pisariaqarpoq.

Taamaammat nunatsinni inuusuttuni ph.d-nngornianik qulaajaaqataasoqarnissaanut aningaasaliisoqassasoq, Inge Høst Seidingip siunnersuutigaa.

- lisimatusarfimmi kandidatinngorlaat qularnanngitsumik qulaajaaqataasinnaakutsoorput. Taamaalillutik sunnerneqaatigiuaannakkatsinnut tunngasut ilisimatusarfigalugillu immikkut ilisimasaqarfigilersinnaavaat, taanna oqarpoq. 

Oqaluttuarisaanermik qulaajaaneq aatsaat aallartilaartoq

Spiralilersuisoqarsimanera, inatsisitigut ataataqanngitsut meeqqallu misileraataasimasut nunatta Danmarkillu oqaluttuarisaanerata oqallisaajuarneranut peqqutaaqataapput.

Taamaammat tamakkua oqallisaajunnaarallarnavianngitsut, Inge Høst Seiding isumaqarpoq.

- Tamakku ilisimatusarfiginissaat pisariaqaqaaq. Kalaallillu amerlanerpaartaasa tamakkua ilisimasaqarfiginerulerusukkaat tusaavara, taanna oqarpoq.

Nunatta Danmarkillu saammaateqatigiinnissaat siunertaralugu oqaluttuarisaanerat qulaajarneqassasoq taavalu politikkikkut aalajangernerit iliuuserisimasallu kingunerluuteqaataasimanerannik nassuerutiginnittoqassasoq, nunat marluk taakku nalunaarutaanni atuarneqarsinnaavoq.

AAMMA ATUARUK Immikkut ilisimasallit: Qulaajaaneq nunasiaateqarnermik oqqatsitsissaaq

Qulaajagassat amerlammata nunatta Danmarkillu oqaluttuarisaanerannik qulaajaaneq naggasiutaaqqajarunarnavianngitsoq, Inge Høst Seiding isumaqarpoq.

- Oqaluttuarisaanerannik qulaajaanissaq allanut ingerlariaqqiffissanut aallartinissaataannaasoraara.

Taamaammat nunarput isertuussanik nunatta oqaluttuarisaaneranut tunngasunik suli qulaajarneqanngitsunik qulaajaasinnaasunik kalaallinik ph.d-nngornianik amerlanerusunik pisariaqartitsivoq.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik danskillu ilinniartitaanermut ilisimatusarnermullu ministereqarfiat ilisimatusartut arlaannaannulluunniiit attuumassuteqanngitsut oqaluttuarisaanermik qulaajaanissaannut suliakkiisuupput.

Qulaajaanissamik suliakkiutip oqaasertalersornerata qaammatip matuma naanerani naammassinissaa pilersaarutaagaluartoq Folketingimut qinersisussaagatta kinguartinneqarpoq.

Qaqugorpiarli naammassineqassanersoq, KNR-imut suli ilisimatitsissutigineqanngilaq.