Nunatsinni neriniartarfik michelinimit nersorneqarsimasutuaq ulloriannalluni nersorneqaqqittoq

Michelin neriniartarfinnik ullorialiilluni Finlandimi ataasinngormat nersornaasiimmat neriniartarfik KOKS marlunnik ullorialerneqaqqilluni nersorneqarpoq. 

Neriniartarfik Savalimmiuneersuuvoq, Ilimanamulli siorna aasakkut nuunneqarallarluni. Neriniartarfik Ilimanami ukioq manna aamma ingerlavoq. 

Ullorissallu marluk neriniartarfimmut nersornaasiissutigineqareersut nersornaasiissutigineqaqqinnerat nalunaarutigineqarmat nuannaarutigineqarpoq. 

- Tupinnaqaaq, nuannaarutigeqaarpullu. Marlunnik ullorialerneqarnerput tulluusimaarutigeqaarput. Sulinerpummi imaannaanngilaq. Sulinitta nersorneqarnera isumaqartorujussuuvoq, KOKS-imi igasut pisortaat Poul Andrias Ziska oqarpoq.    

Ullorialerneqarlutik nersorneqarnertik kingusiinnaq paasigaat

Neriniartarfiup ullorissanik marlunnik nersornaaserneqaqqinneranik nutaarsiassaq nalunaarutigineqarmat neriniartarfik ukioq manna siullermeerluni ammavoq, persuarsiornissamullu piffissaqanngingajassimallutik taanna oqarpoq.

- Neriniartarfiup ammaqqaarnera ulapaarfiusorujussuusarpoq. Taamaammat ataasinngormat ulappittorujussuuvugut, ullorissallu nersornaasiissutigineqartut eqqarsaatiginissaannut piffissaqanngingajalluta. Ulapingarattalu nersornaasiinernut malinnaanngilangaluunniit, tamannalu immikkuullarippoq, taanna oqarpoq. 

Neriniartarfiullumi marlunnik ulloriarlerneqaqqilluni nersornaaserneqarnera nalunaarutigineqarmat suleqatigiinnut tamanut ulloq oqinnerulersimaqisoq Poul Andrias Ziska oqarpoq.

Savalimmiormiut neriniartarfiutaat siorna 2022-mi ukiunik qulinngortorsiorluni nalliuttorsiorpoq, michelinimillu 2019-imi marlunnik ullorialerneqarluni nersornaaserneqarluni, maannamut suli attataminik. 

Nunarput nerisassiornermi aallaavigineqartoq

Neriniartarfimmut neriartortut nunatsinni nerisassioriaatsit nunattalu pissarititaanik atuilluni nerisassioriaaseq misigisaqarfigisassagaat Poul Andrias Ziskap pingaartinnerarpaa.

- Nerisassiassanik atorluarsinnaasatsinnik atorluaasinnaanissarput uagutsinnut pingaarnerpaavoq, taanna oqarpoq.

KOKS Ilulissaniit kujammut 15 kilometerisut ungasitsigisumi nunaqarfimmi Ilimanamiippoq. Taanna neriniartarfik nunatsinni michelinimit nersugatuaavoq. 

Neriniartarfik inunnut 30-nut inissaqarpoq, neriniartarfiullu ungasinngisaani illuaqqani unnuisoqarsinnaalluni.

Nunarput isumaqartorujussuusoq

Neriniartarfik nunatsinnut nuunneqarmat Poul Andrias Ziskap igariaasaanut igaffimmilu misilittaasarneranut isumaqarsimaqaaq. Taassuma saniatigut nunatsinniinnermini ilakkakkaminik siunissami atorluarsinnaasaqarnerarpoq. 

- Ilimanamiinnera misigisaavoq tupinnarluinnartoq. Inuttut aammali suleqatigiittut misigarpassuaqarpugut, qanittuararsuullutami suleqatigiippugut. Ullut tamaasa ataatsimoorluta ullaakkorsioqatigiittuaannarlutalu unnukkorsioqatigiittuaannarpugut.

Poul Andrias Ziska oqaluttuarpoq nammineq aamma suleqatimi nunatsinniinnertik nuannarisimaqigaat ukioq mannalu naggataarluarusupput. 

KOKS Ilimanami ukioq manna naggataamik ammassaaq ulloq septembarip qulingiluaanni. Taassuma kingorna neriniartarfik Savalimmiunut nuunneqaqqissaaq.