Aviisi: Ilimanami takornariaqartitsineq inuinut iluaqutaanngilaq

Ilimanami takornariaqartitsineq inuinut iluaqutaanngilaq. 

Ilimanami aqutsisut ilaat, John Rosbach, Sermitsiaq-mut taama oqarpoq.

Michelinip ulloriaanik marlunnik nersukkamik Koksimik atilimmik neriniartarfiutillit Savalimmiuneersut neriniartarfimmik Ilimanami ammaareersullu Ilimanaq Lodge unnuiffissatut ukioq manna ornigarneqarluarpoq.

Ilulissanili tamatumalu eqqaani takornarialerisuni anginerpaaq, World of Greenland, unnuiffissanik taakkuninnga attartortitsisuuvoq.

Ilimanamimi takornariaqartitsineq tamaanimiuni ikittuinnarnut soorlu eqqiaasunut, illunik attartortitsisunut aalisartunullu takornariartaassuarni ilaasunik angallassisartunut taamaallaat iluaqutaasoq, Sermitsiaq allappoq.

- Neriniartarfiup Koksip Michelinip ulloriaanik marlunnik nersugaasup Ilimanamiinnera nunaqarfimmut iluaqutaangaanngilaq, aningaasalli nunanit allaneersunik takornarialerisunut annerusumik tuttarput, John Rosbach Sermitsiamut oqarpoq.

Koksimi igasut ataasiinnarmik kalaalertaqartut

World of Greenlandilli nunaqavissunik takornarialerisoqarnissi taakkuninngalu suleqateqarnissi pingaartittuaannaraa, tassani pisortaq Asger Køppen Sermitsiamut oqarpoq.

World of Greenlandilu nunaqavissunut unammillertussatut pilersinneqarnikuunngitsoq, taanna erseqqissaavoq.

AAMMA ATUARUK Brijan er den eneste lokale på ny michelinrestaurant: Håber at ændre madkulturen i Grønland

Koksimi igasuni nunatsinneersutuaq, Brijan Isaksen Andersen, KNR-ip qanittukkut apersorpaa. Koksilu nunatsinni nerisassanik sassaalleeriaatsinik pitsanngorsaalluni mumisitsisinnaassasoq, taanna neriuppoq. 

Koksimut neriartortut takornariaakkajupput. Nunaqavissunilli aamma neriartortoqarnerusalissallutik, Brijan Isaksen Andersenip neriuutigaa.

- Neriuppunga inuusuttut siunissami igasunngorumaartussat ooqanngitsulianik tamakkuninnga maani pissarititaasuneersunit isumassarsiniartarumaartut.

- Imaanngikkaluarpoq nunatsinni nerisassioriaaserput nunanut tamalaanut nallersuutassaalersimammat, taanna oqarpoq.

Ilimanaq Ilulissat kilometerinik 15-inik ungasitsigisumi kujasissuanniippoq. Michelinip ulloriaanik nersukkamik nunatsinni aatsaavissuaq neriniartarfeqarpoq.