Brijan neriniartarfimmi michelinimit inassutaasumi igasuni kisimi nunatsinneersuuvoq
![](/sites/default/files/styles/image_934x467/public/article_images/kok_paa_koks.jpg?itok=ktzehqHY)
Mattak, tuttup neqaa, aammalu ammaassaat seernartulikkat, tamakkuupput Ilulissat eqqaani nunaqarfimmi Ilimanami neriniartarfimmi nutaami michingimi nersugaasumi Koksimi takornarianit mamarineqarluartut.
Brian Isaksen Andersen neriniartarfimmi igasuusoq sulisuni kisiartaalluni nunatsinneersuusoq neriuppoq kalaallit aamma amerlanerusut neriniartarfimmut Koksimut neriartortalerumaartut.
![](/sites/default/files/styles/image_934x467/public/koksilimanaq.jpg?itok=LNOCYonV)
Aqissip sulutalimmik Koksimi sassaalliutit ilaat.
Assi: Koks
- Peqataaffigisinnaagakku nuannarilluinnarpara. Angusaqarusussusilinnik suleqateqarpunga, suliffillu nunanut tamalaanut naleqqussagaavoq, tamatta tuluttut oqaluttussaavugut, tamarmillu sapinngisannguartik tamaat tuluttoorniarsarisarput, taamaalillutik allamiut tikittut nuannersumik misigisaqarsinnaaniassammata.
Taama oqarpoq, 25-nik ukiulik Brian Isaksen Andersen nunatsinnni neriniartarfimmi nutaanerpaami Ilimanamiittumi qaffasissumillu sassaallerfiusartumi michilingimilu nersugaasumi Koksimi igasuusoq.
Neriniartarfik Koks-mik ateqarpoq, marlunnillu michelingimiit nersugaalluni ullorialerneqarsimavoq, Savalimmiuniillu aallaaveqartuulluni. Nunatsinnilu aatsaat siullerpaamik taamatut qaffasissusilimmik neriniartarfimmik aammasoqarpoq.
Neriniartarfik inunnut 30-nut inissaqarpoq, Brian Isaksen Andersenilu oqaluttuarpoq, inuit ullormut 15-t 25-illu missaat agguaqatigiissillugu neriartortartut.
Nerisartulli amerlanertigut takornariaasarput, Brian Isaksen Andersenillu neriuutigaa nunatsinni najugaqavissut amerlanerusut takkuttalerumaartut, taannami aamma kisiartaalluni neriniartarfimmi nunatsinneersutuaavoq.
Taanna isumaqarpoq nunatsinni nerisassanik sassaalleeriaaseq pitsanngortikkiartorneqarsinnaasoq.
- Neriuppunga, inuusuttut siunissami igasunngorumaartussat ooqanngitsulianik tamakkuninnga maani pissarititaasuneersunit isumassarsiniartarumaartut. Takornariat amerlanerusut maanga tikikkusulissappata tamakkua qanermut iisassat takornarianit nerisassanik soqutigisaqartunit kajungerineqassaqaat. Imaanngikkaluarpoq nunatsinni nerisassioriaaserput nunanut tamalaanut nallersuutassaalersimammat, taanna oqarpoq.
![](/sites/default/files/styles/image_934x467/public/koksudsigt.jpg?itok=ncKoy29r)
Koksimiit isikkivik.
Assi: Koks.
Mattak, tuttup neqaa, ammassaallu unnukkut arfinernut sassaalliutigineqartaraluartut, nunatsinni nerisassiat ooqanngitsut Brianip isumassarsiorfissatsialattut isumaqarfigai, taassumunngami nunatsinneersut raajat immikkut illuinnartuupput
- Raajanik ooqanngitsunik aamma sassaalliuteqartarpugut, taakkualu nerileruttorlugit raaajap niaquanik qalunermut uutamik naammattuuisarput. Tikeraallu tamakkua tupaallattaqaaq aamma tassa niaqua nerisussannguleraangamikku, assut quianartarput.