Nunatsinni kommunit isumaginninnikkut suliassaannik danskit ikiuussinnaapput

Kommunini isumaginninnikkut suliat pillugit qallunaanit ikiorneqarnissamik oqallinneq akerleriiffiullunilu misilittagarissaarfittut oqalliffiuvoq.
Nunatta kujataani Danmarkimiit isumaginninnermi ikiorneqarneq misilittagarissaarfigaat.
septembarip 12-at 2019 11:13

Nunatsinni kommunit meeqqanut inuusuttunullu isumaginninnikkut sulianik ikorneqarnissamik kissaatitut allatugaat Danmarkip akuersaarpagit, sulisut 65-it nunatsinnukassapput.

Danmarkimiillu assingusunik sulialinnik aggersaasarneq kommuninit arlalinnit misilittagarissaarutaapput.

AAMMA ATUARUK Avataanit ikiorneqarnissaq pisariaqanngilaq

Danmarkimiit ikiorneqarnissamik kissaateqarnissamik majimili oqallisilernermi, isumaqataasoqarlunilu isumaqataanngitsoqarpoq. Isumaginninnermut naalakkersuisup Martha Abelsenip assingusunik sulialinnik Danmarkimiit tikittoqarnissaa iluaqutaassanersoq qularutigalugu oqaaseqarnikuuvoq.

- Isumaqanngilaq avataaninngaanniit tikittut, innuttaasut taamatut sullisissagunikkit, isumaaruttarpoq, qimagunnerit tamaasa takujuaannarparput, ajornartorsiut taannaajuaannartarpoq, Naalakkersuisoq majip arfineq pingajuanni KNR-imi apersorneqarluni taama oqarpoq.

Aqutinikkut sulianik misilittagallit

Kommunilli ilaanni qallunaanik suleqateqarnermi misilittagarissaarput. Kommuneqarfik Sermersuumi nunatsinni nutaajusumik isumaginninnermi misissueriaatsinik misilittagaqartunik suleqateqarluni iluarsimavoq.

- Upernaaq manna Aalborgiminngaaniit sulisut marluk maaniimmata taanna misigilluartorujussuuarput tunniussilluartut ilisimasaminnik. Danmarkimi ukiorpassuit taamatut misissueriaaseq atorneqarnikuuvoq, maani nutaajuvoq inatsimmi aatsaat 2017-imi atuutilersinneqarpoq .

Taama periuseqarneq meeqqanut tapersersuinermut 2017-imi inatsiseqalermat atuutilerpoq. Nunatsinni Danmarkimilu inatsisit atuuttut assigiinngikkaluartut ajornartorsiortitaqarsimanngitsoq, Martha Lund Olsen erseqqissaavoq.

- Isumaginninnermi suleriaatsit taakku sungiussassaapput. Isumaqarpunga ingerlalluarsimasut pissutigalugu illua tungeriit tamarmik imminnut ataqqeqatigiilluinnarlutik ataqatigiissaarillutillu ingerlanikuummata.

AAMMA ATUARUK Ajornartorsiutaasut qulaajarneqarluaqqaartariaqartut

Sulisut aqutsinikkut misilittagaqarnerusut pisariaqartinneqartut

Nunattalu kujataani Danmarkimiit isumaginninnermi ikiorneqarneq misilittagarissaarfigaat. Isumaginninnermimi siunnersortit Aarhusimeersut 2017-imi suliartorpoq.

- Aqutsinikkut sulianut ikiuutaalluarput, ingerlatseriaatsinik pitsaanerusunik pilersitsillutik iliuusisssatullu pilersaarusiassat, kinguaattoorutigisagut, naammassillugit, Kommune Kujallermi isumaginninnermi ingerlatsinermi pisortaq Boris Klarsgaard oqarpoq.

Ingerlatsinermi pisortap oqarnera naapertorlugu aqutsinermi suliat kisiisa aaqqiissutaasinnaanngillat. Suliani ajornartorsiutit aaqqinneqassappata ataavartumik unangasissumullu pilersaarusiukkat pisariaqartinneqarput.