Martha Abelsen Ajornartorsiutaasut qulaajarneqarluaqqaartariaqartut

Partiit amerlanerussuteqartut Tasiilami isumaginninnikkut pissutsinut nunatta avataniit ikiorneqarnissaq kissaatigaat. Isumaginninnermulli naalakkersuisup Martha Abelsenip ajornartorsiutaasunik misissueqqaarnissamik isummani attappaa.
- Taamaattumik Naalakkersuisuninngaanniit partiininngaanniillu oqaannarluta 'qaa ikiorniarsigit' sunik sumullu ikiuinissaq sammissanersoq sammeqqaarnagu takorlooruminaatsipparput, naalakkersuisoq oqarpoq. Assi © : KNR/Jaaku Lyberth
maajip 15-at 2019 15:21

Partiit amerlanerussuteqartut isumaqarput Naalakkersuisut Danmarkimit isumaginninnikkut erngertumik ikioqqusariaqartut.

Tasiilami isumaginninnikkut pissutsit ajorluinnartutut saqqummiunneqarput; meeqqanik kinguaassiutitigut atornerluinerit, imminut toqunnerit isumaginnittoqarfimmilu suliassanngortinneqartut naammassineqarneq ajortut.

AAMMA ATUARUK Suleqatigiissitsisut, Atassut Demokraatillu danskinit ikiorneqarusuttut

Avataanilli ikiorneqarnissaq maanna piffissaanngilaq, ajornartorsiutaasummi qanimut misissoqqaartariaqaritsik neqeroorutillu suut kommuninit amigaatigineqarnersut qulaajarneqarluaqqaartariaqartut, isumaginninnermut naalakkersuisoq erseqqissaaqqippoq:

Tasiilami kinguaassiutitigut pinerluttuliornerit

Tasiilami nunaqarfiinilu kinguaassiutitigut pinerluttuliornerit 193-it ukiut pingasut kingulliit ingerlaneranni nalunaarutigineqarput.


Meeqqanut kinguaassiutitigut pinerluttuliornerit 20-t siorna nalunaarutigineqartut, kinguaassiutitigut pinerluttuliornerit 15-it maanna suliarineqarput.

 

Tasiilami meeqqat pingasuugaangata ataaseq kinguaassiutitigut atornerlunneqareersimasuuvoq. Meeqqat marluugaangata ataaseq kommunimi isumaginnittoqarfimmi suliassanngortinneqarsimasuuvoq.

 

- Qanoq immikkut ikiorsiisoqarnissaa uagut aamma susassaqartuninngaanniit aallaaveqartumik, innuttaasut peqatigalugit, susassaqartut suleqatigalugit, avammut ikiorsiissutissanik annertunerusunik pisariaqartitsigutta anngutissaqqaarpagut, Martha Abelsen (S) oqarpoq.

Tasiilami isumaginninnikkut pissutsinut suliniuteqartoqartoq, naalakkersuisup ilanngullugu oqaatigaa.

Assersuutigaalu tarnip pissusaanik ilisimasallit sisamat, innuttaasunik ikorfartorneqarnissamik pisariaqartitsisunik oqaloqatiginnikkiartorlutik qaammatikkaartuni angalasartut, Tasiilamukartarnerat sivitsorneqartoq. 

Tarnip pissusaanik ilisimasallit angalasartut marluk meeqqanik marlullu inersimasunik oqaloqateqartarput.

AAMMA ATUARUK Suleqatigiinnerunissaq neriuutigaara

- Tassanngaannarsuaq iliuuseqarnissaq takorlooruminaatsittorujussuuarput suussanersoq. Paasinaguluunniit sukkununa pisariaqartitsisoqartoq. Nalunngilarput meeqqat inuusuttullu, imaluunniit ilaqutariit, immikkut ikiorsiiffigineqartariaqartut, taakkua kommunimit ilisimaarineqaqqissaarput. 

- Taamaattumik Naalakkersuisuninngaanniit partiininngaanniillu oqaannarluta 'qaa ikiorniarsigit' sunik sumullu ikiuinissaq sammissanersoq sammeqqaarnagu takorlooruminaatsipparput.

AAMMA ATUARUK Avataanit ikiorneqalertigata ajornartorsiutaasut misissorneqaqqaassasut

Isumaginninnermut naalakkersuisoq Martha Abelsen taamaalilluni parteeqatimi isumaanik assingusumik isummerpoq.

Naalakkersuisoq maajip 29-aniit Tasiilamiissaaq, tikeraarnerminilu innuttaasut suleqatigalugit suut ajornartorsiutaanersut paasiniassavai.