Siumut Avataanit ikiorneqalertigata ajornartorsiutaasut misissorneqaqqaassasut
Avataanit ikiorneqalertigata, Tasiilami isumaginnittoqarfimmi ajornartorsiuterpassuit qanimut, innuttaasut suleqatigalugit, Naalakkersuisunit misissorneqaqqaassapput.
Ilaqutariinnermut peqqissutsimullu ataatsimiititaliami siulittaasoq taama oqarpoq.
AAMMA ATUARUK Suleqatigiissitsisut, Atassut Demokraatillu danskinit ikiorneqarusuttut
- Tassani takoqqaarusutaat uagut taperserparput. Tassa; pisariaqartitsineq qanoruna annertutigisoq? Taavalu sulisoqarnikkut unammilligassat immaqaluunniit kivissinnaasaat nalilersorneqaqqaassapput, Laura Táunâjik (S) oqarpoq.
Isumaginninnermut naalakkersuisoq, Martha Abelsen (S), Tasiilami isumaginnittoqarfimmi ajornartorsiutit sunik aallaaveqarnersut misissoriartorlugit, innuttaasullu oqaloqatigiartorlugit, maajip naalernerani Tasiilamukassaaq.
Taamaammat Siumumeersut, Danmarkimit nunastinni ikiorneqartigata, ajornartorsiutit misissoqqaarusuppaat.
Partii Naleraq: Erngertumik ikiorneqarta
Tasiilami kinguaassiutitigut pinerluttuliornerit
Tasiilami nunaqarfiinilu kinguaassiutitigut pinerluttuliornerit 193-it ukiut pingasut kingulliit ingerlaneranni nalunaarutigineqarput.
Meeqqanut kinguaassiutitigut pinerluttuliornerit 20-t siorna nalunaarutigineqartut, kinguaassiutitigut pinerluttuliornerit 15-it maanna suliarineqarput.
Tasiilami meeqqat pingasuugaangata ataaseq kinguaassiutitigut atornerlunneqareersimasuuvoq. Meeqqat marluugaangata ataaseq kommunimi isumaginnittoqarfimmi suliassanngortinneqarsimasuuvoq.
Illuatungaanili Inatsiartuni ilaasortat amerlanersaasa, tassalu Inuit Ataqatigiit, Atassut, Suleqatigiissitsisut, Demokraatit Partii Nalerarlu Danmarkimit maanna ikiorneqarnissaq kissaatigaat.
- Ikiuuttussat kikkulluunniit ikiuuttariaqarput, arlaatigut ilungersunartumik nalaataqarsimatilluta avataaninngaanniit ikiorneqaraangatta ikiuigaangattalu assorujussuaq tuppallernartarami. Taamaammat ikiuerusuttunut naaggaartorneq akisussaassuseqanngitsuliornertut taarusupparput, Partii Naleqqami siulittaasoq Hans Enoksen oqarpoq.
Siumut: Innuttaasut qanimut suleqatigineqaqqaarlik
Ajornartorsiutaasulli qulaaninngaanniit naammassinagit innuttaasut qanimut suleqatigineqartariaqartut, Laura Táunâjik oqarpoq:
- Pingaaruteqarpoq innuttaasut peqataatillugit tusarniaanissaq pingaaruteqarporlu tusaaneqartutut misiginissaat Naalakkersuisunit orninneqarlutik. Taamaammat isumaqarpunga periarfissaq taanna pissusissamisoortoq.
Suleqatigiissitsisut suleriaatsimik, nunatsinni eqqartuussiviit suliassaasa amerlinerujussuisa ikilisarneqarnissaannut suliniutaasimasumut assingusumik, suliniuteqarnissaq siunnersuutigaat.
AAMMA ATUARUK Avataanit ikiorneqarnissaq pisariaqanngilaq
Danskit eqqartuussissuserisuisa taamani ikiuunnerisigut suliat ikilipput.
Nunatsinni meeqqat inuusuttullu pillugit suliniutinik 2020-p tungaanut pitsanngorsaataasussanik Folketingimit 10 millionit koruunit immikkoortinneqarput.
Aningaasat Danmarkimi Isumaginninnermik Aqutsisoqarfiup, Namminersorlutik Oqartussat nunattalu kommuuniisa akornanni suleqatigiinnissamut, ilaatigullu 'aaqqissuussaanermut' aamma 'ilisimasaqarnerulernissamut' atorneqassasut, Naalakkersuisut allapput.